2021-ci ilin yanvar-sentyabr aylarında Gəncə şəhərində pərakəndə ticarət dövriyyəsi haqqında məlumatlar açıqlanıb.

Gəncə Şəhər Statistika İdarəsindən Marja-ya verilən məlumata görə, 2021-ci ilin yanvar-sentyabr aylarında Gəncə şəhərinin pərakəndə ticarət şəbəkəsində istehlakçılara 871 milyon 232,1 min manatlıq məhsul, o cümlədən 541 milyon 466,3 min manatlıq ərzaq məhsulları, içkilər və tütün məmulatları,329 milyon 765,8 min manatlıq qeyri-ərzaq malları satılmışdır. 2020-ci ilin yanvar-sentyabr ayları ilə müqayisədə pərakəndə ticarət dövriyyəsi real ifadədə 3,9 faiz, o cümlədən ərzaq məhsulları, içkilər və tütün məmulatları üzrə 4,1 faiz, qeyri-ərzaq malları üzrə isə 3,3 faiz artmışdır.

2021-ci ilin yanvar-sentyabr aylarında istehlak mallarının dəyər ifadəsində 18,1 faizi ticarət müəssisələri, 67,6 faizi fərdi sahibkarlar tərəfindən, 14,3 faizi isə bazar və yarmarkalarda satılmışdır.

2020-ci ilin yanvar-sentyabr ayları ilə müqayisədə pərakəndə ticarət dövriyyəsi real ifadədə müəssisələr üzrə 44,7 faiz, fərdi sahibkarlar üzrə 18,6 faiz artmış, bazar və yarmarkalarda isə 46,5 faiz azalmışdır.

Hesabat dövründə ticarət şəbəkəsindən hər bir şəhər sakini orta hesabla ayda 271,2 manatlıq istehlak malları, o cümlədən 168,5 manatlıq ərzaq məhsulları, içkilər və tütün məmulatları,102,6 manatlıq qeyri-ərzaq malları almışdır.

2021-ci ilin yanvar-sentyabr aylarında Gəncə şəhərində ictimai iaşə dövriyyəsi və ödənişli xidmətlər haqqında

Gəncə şəhərində 2021-ci ilin yanvar-sentyabr aylarında ictimai iaşə dövriyyəsinin həcmi əvvəlki ilin eyni dövrü ilə müqayisədə 2,5 faiz artaraq 13504,8 min manat təşkil etmişdir. Dövriyyənin 56,3 min manatı hüquqi, 13448,5 min manatı isə fiziki şəxslərin payına düşür.

2021-ci ilin yanvar-sentyabr aylarında əhaliyə göstərilən ödənişli xidmətlərin dəyəri 2020-ci ilin müvafiq dövrünə nisbətən real ifadədə 5,0 faiz artaraq 258 milyon 549,4 min manat təşkil etmişdir. Hüquqi şəxslər tərəfindən əhaliyə 57 milyon 339,4 min manatlıq xidmət göstərilmiş və xidmətlərin ümumi dəyərinin 22,2 faizini təşkil etmişdir. Ödənişli xidmətlərin 12,5 faizi dövlət, 87,5 faizi isə qeyri-dövlət mülkiyyətindən ibarət olmuşdur.

Yanvar-sentyabr aylarında əhalinin hər bir nəfəri orta hesabla 80,5 manatlıq və ya ötən ilin müvafiq dövrü ilə müqayisədə 7,2 manat çox müxtəlif ödənişli xidmətlərdən istifadə etmişdir.