Təl-Əviv yaşayış xərcinə görə Paris və Honq-Konqu geridə qoyub və 2021-ci ildə dünyanın yaşamaq üçün ən bahalı şəhəri olub. 

Marja.az xəbər verir ki, bu barədə çərşənbə günü “Jerusalem Post” Britaniyanın “The Economist Group” şirkətinin analitikləri tərəfindən hazırlanan dünyanın 173 iri şəhərində yaşayış minimumu (Worldwide Cost of Living 2021) araşdırmasına istinadən məlumat yayıb.

İsrailin paytaxtı beşinci yerdən birinci yerə keçib.

Qəzet qeyd edir ki, 2020-ci ildə Təl-Əviv Paris, Honq-Konq, Osaka və Cenevrədən sonra ən bahalı beşinci şəhər olmuşdu.

Qəzet qeyd edir ki, Təl-Əvivin birinci yerə yüksəlməsinə İsrail şekelinin ABŞ dollarına nisbətdə məzənnəsinin dəyər qazanması, ərzaq və nəqliyyatın bahalaşması səbəb olub. Bu il şəhərdə əmtəə və xidmətlərin orta qiymətləri yerli valyutada 3,5% artıb. Qiymətlər ötən il cəmi 1,9% artmışdı.

Pandemiyanın başlanğıcından bəri İsrail valyutası dollara nisbətdə təxminən 10% bahalaşıb. Bir ay əvvəl Dollar/İsrail şekeli məzənnəsi ötən əsrin 90-cı illərinin ortalarından bəri ilk dəfə olaraq bir dollar üçün 3,04 şekelə düşüb. 2015-ci ildə 1 dollar 4 şekele bərabər idi.

İsrail dünyanın ən sürətli Covid-19 peyvənd proqramlarından birinə sahibdir. “Our World in Data”nın rəqəmlərinə görə, Bazar ertəsi günü İsrail əhalisinin 62%-i tam peyvənd olunub. 

EIU-nun 173 şəhərdə 200-dən çox məhsul və xidmətin qiymətlərini araşdıran son araşdırmasında Təl-Əvivdə malların təxminən onda biri bahalaşıb.

EIU bildirib ki, tədarük zənciri problemləri, valyuta məzənnələrindəki dalğalanmalar və istehlak tələbindəki dəyişikliklər əmtəələrin və digər malların qiymətlərində  artıma səbəb olub. Araşdırmaya görə, 2021-ci ildə benzinin litrinin qiyməti orta hesabla 21% artıb. Ən böyük bahalaşma nəqliyyatda baş verib.

EIU-dan Upasana Dutt bildirib ki, maaşlar artdıqca gələn il bir çox şəhərlərdə qiymətlərin daha da artacağı gözlənilir.

Reytinqdə ikinci yerdə Fransanın paytaxtı Paris, üçüncü yerdə isə Sinqapur qərarlaşıb.

2021-ci ildə Dünyada ən bahalı şəhərlər

1. Təl-Əviv, İsrail

2. Paris, Fransa

3. Sinqapur

4. Sürix, İsveçrə

5. Honkonq, Çin

6. Nyu York, ABŞ.

7. Cenevrə, İsveçrə

8. Kopenhagen, Danimarka

9. Los-Anceles, ABŞ.

10. Osaka, Yaponiya

Dünyanın ən ucuz şəhərləri isə Dəməşq (Suriya),Tripoli (Liviya), Daşkənd (Özbəkistan), Tunis (Tunis), Almatı (Qazaxıstan), Kəraçi (Pakistan), Əhmədabad (Hindistan), Əlcəzair (Əlcəzair), Buenos Ayres (Argentina) və Lusakadır (Zambiya)