“Bank Avrasiya” ASC-nin xalis mənfəəti 2026-cı ilin 9 ayı ərzində (yanvar-sentyabr) ötən ilin müvafiq dövrü ilə müqayisədə 30% azalaraq 4 milyon manata yaxın olub. Bankın aktivləri və depozit portfeli artsa da, faiz xərclərindəki kəskin yüksəliş və qeyri-faiz xərclərinin artması mənfəətə təzyiq göstərib.

Marja.az xəbər verir ki, bu, “Bank Avrasiya” ASC-nin açıqladığı maliyyə hesabatlarından məlum olur.

Hesabatlara əsasən, bankın 2026-cı ilin yanvar-sentyabr ayları ərzində xalis mənfəəti 3 milyon 996 min manat təşkil edib. Ötən ilin müvafiq dövründə bu göstərici 5 milyon 706 min manat olub. Beləliklə, bankın xalis mənfəəti 1 milyon 709 min manat və ya 30% azalıb. 

Bankın faiz gəlirləri artsa da, faiz xərcləri daha sürətlə yüksəlib

Hesabat dövründə “Bank Avrasiya”nın faiz gəlirləri 12,1% artaraq 12 milyon 205 min manatdan 13 milyon 684 min manata yüksəlib. Faiz gəlirlərinin əsas hissəsini müştərilərə verilmiş kreditlər üzrə daxilolmalar təşkil edib. Bu istiqamətdə gəlirlər 10 milyon 86 min manatdan 10 milyon 531 min manata çatıb.

Bankların və digər maliyyə institutlarının depozitləri üzrə faiz gəlirləri isə 55,2% artaraq 1 milyon 864 min manat olub. Bununla yanaşı, bankın faiz xərcləri 65,5% artaraq 1 milyon 805 min manatdan 2 milyon 988 min manata yüksəlib. Xüsusilə depozitlər üzrə faiz xərcləri 357 min manatdan 1 milyon 503 min manata çataraq 4,2 dəfə artıb.

Faiz xərclərinin gəlirlərdən daha sürətlə artmasına baxmayaraq, xalis faiz gəliri 10,9% artaraq 10 milyon 114 min manat təşkil edib.

Qeyri-faiz xərcləri 1,3 milyon manat artıb

Bankın qeyri-faiz gəlirləri 15,2% artaraq 2 milyon 568 min manat olub. Bu gəlirlərin 647 min manatı haqq və komissiyalardan, 428 min manatı xarici valyuta əməliyyatlarından, 1 milyon 493 min manatı isə digər mənbələrdən əldə edilib.

Qeyri-faiz xərcləri isə 17,5% artaraq 8 milyon 536 min manata yüksəlib.

Xərclərin 3 milyon 425 min manatı əməkhaqqı və digər kompensasiyalara, 570 min manatı ümumi və inzibati xərclərə, 589 min manatı amortizasiyaya, 3 milyon 952 min manatı isə digər xərclərə yönəldilib.

Bankın əməliyyat mənfəəti cəmi 1,5% artaraq 4 milyon 146 min manat təşkil edib.

Mənfəətin azalmasında ötən ilin müvafiq dövrü ilə müqayisədə gözlənilməz fəaliyyət növlərindən gəlirlərin azalması və hesabatda əks olunan digər ehtiyat göstəriciləri də rol oynayıb. 

Aktivlər 239 milyon manatı ötüb

“Bank Avrasiya”nın cəmi aktivləri 2025-ci ilin sonundakı 214 milyon 510 min manatdan 30 sentyabr 2026-cı il tarixində 239 milyon 154 min manata yüksəlib. Beləliklə, bankın aktivləri 24 milyon 644 min manat və ya 11,5% artıb.

Aktivlərin strukturunda banklar və digər maliyyə institutlarındakı depozitlər 40,9% artaraq 61 milyon 946 min manata çatıb.

Ticarət və investisiya qiymətli kağızlarının həcmi isə 301 min manatdan 5 milyon 962 min manata yüksəlib.

Biznes kreditləri azalıb, istehlak və ipoteka kreditləri artıb

Bankın müştərilərə verdiyi kreditlərin ümumi həcmi ötən ilin sonundakı 137 milyon 140 min manatdan 139 milyon 530 min manata yüksəlib. Kredit portfelinin ayrı-ayrı istiqamətlərində isə fərqli dinamika müşahidə edilib.

İstehlak kreditləri 15,4% artaraq 26 milyon 678 min manat, daşınmaz əmlak kreditləri 5,4% artaraq 61 milyon 610 min manat təşkil edib.

Biznes kreditləri isə 7,8% azalaraq 55 milyon 581 min manatdan 51 milyon 243 min manata düşüb.

Mümkün zərərlər üçün yaradılmış məqsədli ehtiyatlar çıxıldıqdan sonra bankın xalis kredit portfeli 127 milyon 780 min manat olub. 

Əhalinin bankdakı əmanətləri 31% artıb

Bankın depozit portfeli 2025-ci ilin sonu ilə müqayisədə 25,5% artaraq 71 milyon 481 min manatdan 89 milyon 723 min manata yüksəlib. Artım əsasən fiziki şəxslərin əmanətləri hesabına təmin edilib. Belə ki, əhalinin bankdakı depozitləri 19 milyon 24 min manat və ya 31% artaraq 80 milyon 372 min manata çatıb.

Hüquqi şəxslərin depozitləri isə 7,7% azalaraq 10 milyon 134 min manatdan 9 milyon 352 min manata enib.

Nəticədə fiziki şəxslərin vəsaitləri bankın ümumi depozit portfelinin təxminən 89,6%-ni təşkil edib.

Bankın öhdəlikləri və kapitalı artıb

“Bank Avrasiya”nın cəmi öhdəlikləri 16,3% artaraq 144 milyon 779 min manata çatıb. Bankın balans kapitalı isə 4,9% artaraq 89 milyon 985 min manatdan 94 milyon 374 min manata yüksəlib.

Səhmdar kapitalı dəyişməyərək 71 milyon 800 min manat səviyyəsində qalıb.

Bölüşdürülməmiş mənfəət 15 milyon 682 min manatdan 19 milyon 678 min manata, ümumi ehtiyatlar isə 2 milyon 503 min manatdan 2 milyon 896 min manata yüksəlib. maliyy_v_ziyy_ti_haqqinda_hesabat.pdf

Kapital adekvatlığı 56,48% təşkil edir

Bankın kapital strukturu haqqında hesabatına əsasən, tutulmalardan sonra məcmu kapitalı 92 milyon 120 min manat, risk dərəcəsi üzrə ölçülmüş aktivləri isə 163 milyon 107 min manat təşkil edib. Bankın I dərəcəli kapital adekvatlığı əmsalı 52,87%, məcmu kapital adekvatlığı əmsalı isə 56,48% olub.

Bankın maliyyə göstəriciləri bir neçə mühüm tendensiyanı üzə çıxarır.

Birincisi, bankın depozit bazası aktiv şəkildə böyüyür. Lakin depozitlər üzrə faiz xərclərinin sürətlə artması cəlb edilən vəsaitlərin bank üçün daha baha başa gəldiyini göstərir.

İkincisi, kredit portfelində artım məhdud olaraq qalır. Biznes kreditlərinin azalması fonunda istehlak və daşınmaz əmlak kreditlərinin həcmi yüksəlir.

Üçüncüsü, bankın aktivlərinin artımında kreditləşmədən daha çox digər maliyyə institutlarında yerləşdirilən depozitlər və qiymətli kağızlara investisiyalar rol oynayıb.

Nəhayət, əməliyyat mənfəətinin cüzi artmasına baxmayaraq, xalis mənfəətin 30% azalması bankın mənfəətlilik dinamikasında zəifləməyə işarə edir.