Dünyanın ən böyük polad şirkətlərindən biri olan "ArcelorMittal", yüksək enerji qiymətləri səbəbiylə Avropada bir sıra zavodlarında istehsalını dayandırıb.

Marja xəbər veri rki, bu barədə cümə axşamı günü Britaniyanın "Financial Times" qəzeti Lüksemburqda yerləşən şirkətin açıqlamasına istinadən məlumat yayıb.

"ArcelorMittal", xüsusilə inşaat sektoru üçün məhsullar istehsal edən Avropadakı zavodlarında istehsalı dayandırmaq məcburiyyətində qaldığını qeyd edib. 

Qlobal polad bazarının təxminən 10% -nə nəzarət edən şirkət, bu qərarın "iqtisadi xərclər baxımından polad istehsalını çətinləşdirən yüksək elektrik enerjisi qiymətlərinə cavab olaraq" verildiyini vurğulayıb. 

Polad istehsalçısının açıqlamasına görə, mövcud vəziyyət onun ümumi istehsal həcminə, eləcə də istehlakçı tələbatını ödəmək qabiliyyətinə "ciddi təsir göstərməyəcək".

"Financial Times", "ArcelorMittal"ın Avropa zavodlarında orta hesabla ildə təxminən 40 milyon polad istehsal etdiyini, bunun da dörddə birini inşaat sektorunun ehtiyaclarına ödədiyini hesablamışdır. Ümumilikdə, 2020 -ci ildə Lüksemburqda yerləşən şirkət 78,5 milyon ton polad istehsal edib - bu göstəriciyə görə dünyada yalnız Çinin "China Baowu Group" şirkətindən sonra ikinci yerdədir.

Daha əvvəl, İngiltərənin sənaye birliyi "UK Steel", bu qışda elektrik enerjisi qiymətlərinin artmağa davam edəcəyi təqdirdə İngiltərədə polad istehsalının artıq heç bir fayda verməyəcəyi barədə xəbərdarlıq etmişdir. Birlik, bəzi müəssisələrin qeyri-müəyyən müddətə fəaliyyətlərini dayandırmaq məcburiyyətilə üzləşə biləcəyini qeyd etmişdi.

Avropanın anbarlarında doluluq səviyyəsinin aşağı olması və Asiyada tələbatın rekord artması fonunda qaz qiymətləri bir neçə aydır artmağa davam edir. Oktyabrın 6-da ICE birjasında qiymət 1000 kubmetr üçün 1900 dolları keçərək rekord qeyd etmiş, lakin bundan sonra enməyə başlamışdı. Cümə axşamı günü ICE birjasında qazın qiyməti 1000 kubmetr üçün 1200 dolların üzərində idi.

Qeyd edək ki, elektrik enerjisi istehsalında qazdan istifadə edilir. Təbii qazın bahalaşması elektrik enerjisinin də bahalaşmasına səbəb olur.