“Biz yüksələn iqtisadi dinamikanı vergi ödəyicilərinin sayında da müşahidə edirik”.

Bunu iqtisadiyyat naziri Mikayıl Cabbarov Bakıda keçirilən “Dayanıqlı inkişafın maliyyələşdirilməsi: COVID-19 pandemiyasından dayanıqlı və yaşıl bərpa” mövzusunda tədbirdə bildirib.

“Bu ilin 9 ayında Azərbaycanda vergi ödəyicilərinin sayı 5% artıb. Qlobal səviyyədə, o cümlədən ölkəmizdə koronavirus (COVID-19) pandemiyası ilə bağlı biznesə verilən dəstək, eləcə də vaksinasiya beynəlxalq maliyyə qurumlarının Azərbaycanla bağlı proqnozlarına təsir edib və onlar bu il üçün iqtisadi artım proqnozlarımızı yaxşılaşdırıblar. Ümumilikdə, son 10 ildə ölkədə aparılan struktur islahatları, iqtisadiyyatın şaxələndirilməsi qeyri-neft-qaz sektorunu iqtisadiyyatın aparıcı inkişaf amilinə çevrilib, ümumi daxili məhsulun (ÜDM) tərkibində onun xüsusi çəkisi 48%-dən 70%-ə çatıb”, - deyə o, qeyd edib.

Azərbaycan son 10 ildə 57 milyard dollar birbaşa xarici sərmayə cəlb edib

iqtisadiyyat naziri bildirib ki, Azərbaycanın sənaye zonalarında istehsalın ümumi dəyəri 4,3 milyard manatdan çox olub.

Onun sözlərinə görə, sənaye zonalarına qoyulmuş sərmayələrin ümumi məbləği isə 6,1 milyard manatı keçib.

“Son 10 ildə ölkə iqtisadiyyatına yatırılan birbaşa xarici investisiyalar cari və gələcək dövrlərdə iqtisadi artımın mühüm amillərindən biri olub. Bu dövr ərzində ölkəyə cəlb edilmiş birbaşa xarici investisiyaların məbləği 57 milyard ABŞ dolları təşkil edib. Son vaxtlar alternativ energetikaya xarici investorların marağı artıb”, - deyə M.Cabbarov qeyd edib.

“Pandemiyaya görə yardım 5 milyon vətəndaşı əhatə edib”

Nazir, “Koronavirus (COVID-19) pandemiyasından əvvəl dünya iqtisadiyyatında orta hesabla 3,5% illik artım olmuşdusa, pandemiyanın davam etdiyi 2020-ci ildə 3,2% azalma olub”, - bildirib.

“Ötən il pandemiya ilə bağlı Azərbaycanda ümumi daxili məhsil 4,3% azalıb. Dövlətin gəlirləri azalsa da, hökümət makro iqtisadi sabitliyin təmin edilməsi üçün əhaliyə və biznesə 2,7 milyard ABŞ dolları məbləğində yardım göstərib. Bu yardım paketi 5 milyon vətəndaşı əhatə edib”, - deyə o, qeyd edib.

Nazirin sözlərinə görə, 2021-2022-ci illər Azərbaycan iqtisadiyyatının bərpa dövrü olacaq və münbit dinamika bu ilin sonuna qeyri-neft ixracının dəyərini 2,2 milyard dollara çatdırmağa imkan verəcək.

Telegramda Marja.az səhifəsinə abunə olun

“Report”