“Grow Group Azerbaijan” MMC Birləşmiş Ərəb Əmirliklərinə məhsul ixracına start verib.

"Marja" xəbər verir ki, bunu “Grow Group Azerbaijan” şirkətinin sahibi İsgəndər Qurbanov bildirib.

“Şirkətimiz 2010-cu ildən fəaliyyət göstərir və üç əsas istiqamət üzrə ixtisaslaşıb. Biz müasir avtomatlaşdırılmış istixanaların tikintisi və servis xidmətləri məşğul olur və il boyu tərəvəz becərdiyimiz şəxsi istixanaları idarə edirik. Bizim şirkət Azərbaycan üzrə çoxsaylı layihələr reallaşdırıb, şirkətin Dağıstan və Rusiyada sifarişçiləri var. Biz hazırda Birləşmiş Ərəb Əmirliklərinə məhsul ixracına start veririk. Biz bu sərgidə dəfələrlə iştirak etmişik və bu bizim üçün böyük təbliğatdır və zənnimcə, imici formalaşdırır. Sərgi şirkət barədə bir daha məlumat vermək üçün yaxşı imkan yaradır”.

Tərəfdaşları barədə məlumat verən İsgəndər Qurbanov bildirib ki, bunlar Fransanın “Richel”, Niderland Krallığının “Stolze” şirkətləri və bir sıra digər müəssisələrdir:

“Qabaqcıl şirkətlərlə peşəkar əlaqələr bizim istifadəyə hazır şəkildə, hətta bəzən bitkilərlə birlikdə təhvil verdiyimiz istixanaların tikintisi üçün zəruri keyfiyyətli avadanlıqları əldə etməyə imkan verir. Biz məhsulların becərilməsinə görə cavabdehik. Biz ilk növbədə ən yaxşı sortları seçirik. İkincisi, bütün istixanalar “Priva” kompüter (hətta “I-pad”) sistemi vasitəsi ilə idarə olunur, zəruri miqdarda gübrə və digər əlavələr verilir.

Qeyd etmək istərdim ki, bizim şirkətin məsləhətçiləri xarici mütəxəssislərdir. Biz burada Gəncə Aqrar Universitetinə müraciət edir və gələcəkdə istixanaların istismarı üzrə zəruri xidmətlərin göstərilməsi üçün kadrlar hazırlamaq məqsədi ilə tələbələri təlimə dəvət edirik”.

“Grow Group Azerbaijan” MMC ən son standartlara cavab verən, Avropa texnologiyası və avadanlıqları ilə təchiz edilən, tam avtomatlaşdırılmış müasir plastik və şüşə istixana komplekslerinin satışı və quraşdırılması ilə məşğuldur. “Grow Group Azerbaijan” MMC yalnız istixana kompleksinin quraşdırılması və satışı ilə məşğul deyil. O həm də peşəkar istixana sənayesi üçün təchizatçı, quraşdırma təminatçısı və istixanada avadanlıqların düzgün istifadə edilməsi ilə bağlı məsləhətçidir.

“Grow Group Azerbaijan” MMC-nin nəzdnində fəaliyyət göstərən Bakı İstixana Kombinatı holland texnologiyası əsasında yüksək keyfiyyətli, ləzzətli və ən əsası, kimyəvi preparatlardan istifadə olunmadan əldə edilən təbii məhsulların yetişdirilməsi üzrə ixtisaslaşdırılmış bir müəssisədir. Burada yerləşən istixanalarda ilin bütün fəsillərində müxtəlif növ tərəvəz bitkilərinin yetişdirilməsi üçün hər bir şərait yaradılıb.