Maliyyə Nazirliyi 2021-ci ilin ilk altı ayı ərzində Azərbaycan Respublikası dövlət büdcəsinin icrasına (operativ) dair məlumat yayıb.

Operativ məlumata əsasən, 2021-ci ilin ilk altı ayında dövlət büdcəsinin gəlirləri və maliyyələşdirmə əməliyyatları üzrə daxilolmaları 12 milyard 668,6 milyon manat təşkil etməklə, 11 milyard 590,5 milyon manat xərclərindən 1 milyard 78,1 milyon manat artıq olmuşdur.

Gəlirlər

Dövlət büdcəsinin gəlirləri 12 milyard 177,2 milyon manat proqnoza qarşı 11 milyard 755,0 milyon manat və ya 96,5 faiz icra olunmuşdur.

Cari ilin birinci yarımilində Azərbaycan Respublikasının İqtisadiyyat Nazirliyi yanında Dövlət Vergi Xidmətinin xətti ilə dövlət büdcəsinə 4 milyard 342,0 milyon manat vəsait daxil olmuşdur ki, bu da proqnoza nisbətən 851,6 milyon manat və ya 24,4 faiz, 2020-ci ilin eyni dövrü ilə müqayisədə isə 336,7 milyon manat  və ya 8,4 faiz çoxdur. Həmin vəsaitin 73,1 faizi və yaxud 3 milyard 175,3 milyon manatı qeyri-neft sektorundan daxilolmaların payına düşməklə 2020-ci ilin eyni dövrü ilə müqayisədə 276,2 milyon manat və ya 9,5 faiz çox olmuşdur.

Azərbaycan Respublikası Dövlət Gömrük Komitəsinin xətti ilə dövlət büdcəsinə 2 milyard 38,2 milyon manat vəsait təmin edilmişdir ki, bu da proqnoza nisbətən 259,7 milyon manat və ya 14,6 faiz,  +2020-ci ilin eyni dövrü ilə müqayisədə isə 18,4 milyon manat  və ya 0,9 faiz çoxdur.

Azərbaycan Respublikasının Dövlət Neft Fondundan dövlət büdcəsinə 4 milyard 696,7 milyon manat və ya altı aylıq proqnozla nəzərdə tutulduğundan 1 milyard 403,2 milyon manat (23,0 faiz) az vəsait daxil olmuşdur.

Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti tərəfindən dövlət əmlakının icarəyə verilməsindən icarə haqqı şəklində dövlət büdcəsinə 7,3 milyon manat vəsait daxil olmaqla proqnoza 135,2 faiz əməl edilmiş, 2020-ci ilin eyni dövrü ilə müqayisədə isə 2,7 milyon manat və ya 1,6 dəfə çox olmuşdur. Özəlləşmədən (dövlət əmlakının satışından) daxilolmalar 32,3 milyon  manat təşkil etmişdir ki, bu da 2020-ci ilin eyni dövrünə nisbətən 31,7  milyon manat (56,3 dəfə) çoxdur. 

Dövlət büdcəsindən maliyyələşdirilən təşkilatların ödənişli xidmətlərindən 276,4  milyon manat vəsait daxil olmuşdur ki, bu da 2020-ci ilin eyni dövrü ilə müqayisədə 10 milyon manat və ya 3,8 faiz çoxdur.

Sair daxilolmalar üzrə dövlət büdcəsinə 154,4 milyon manat vəsait daxil olmuşdur ki, bu da proqnoza qarşı 121,4 milyon manat və ya 4,7 dəfə, 2020-ci il ilin eyni dövrü ilə müqayisədə isə 102,8 milyon manat və ya 3,0 dəfə çoxdur.

Dövlət borcu və zəmanəti üzrə öhdəliklərin Təminat Fondundan dövlət büdcəsinə 240 milyon manat vəsait transfert olunmuşdur.

Xərclər

2021-ci ilin ilk altı ayı ərzində dövlət büdcəsinin xərcləri 12 milyard 70,8 milyon manat proqnoza qarşı 11 milyard 590,5 milyon manat və ya 96,0 faiz icra edilmişdir.

Dövlət büdcəsi xərclərinin 7 milyard 654,9 milyon manatı və ya 66,0 faizi cari xərclərə, 3 milyard 52,1 milyon manatı və ya 26,4 faizi əsaslı xərclərə (2020-ci ilin eyni dövrü ilə müqayisədə 500,2 milyon manat və ya 19,6 faiz çox), 883,5 milyon manatı  və ya 7,6 faizi  dövlət borcuna və öhdəliklərinə xidmətlə bağlı xərclərə (2020-ci ilin eyni dövrü ilə müqayisədə 2,8 milyon manat və ya 0,3 faiz çox) yönəldilmişdir.

Sosialyönümlü xərclər (iqtisadi təsnifata uyğun olaraq əməyin ödənişi fondu, təqaüd və sosial müavinətlər, dərman və ərzaq xərcləri) dövlət büdcəsinin faktiki xərclərinin 44,1 faizini təşkil etməklə 5 milyard 111,7 milyon manat məbləğində icra olunmuş, ötən ilin eyni dövrü üzrə həmin xərc əmaliyyatlarını 127,3 milyon manat və ya 2,6 faiz üstələmişdir.

Hesabat dövründə büdcə təşkilatlarının təqdim etdikləri xərc sifarişləri üzrə xəzinədarlıq orqanları tərəfindən qəbul edilmiş öhdəliklər tam və vaxtında maliyyələşdirilmişdir.

2021-ci ilin ilk altı ayında dövlət büdcəsinin profisiti 164,5 milyon manat təşkil etmişdir. 

Həmin dövr ərzində xarici kredit təşkilatları ilə imzalanmış kredit sazisləri üzrə 107,2 milyon manat vəsait istifadə olunmuş, həmçinin dövlət istiqrazlarının investorlara satışı üzrə 774 milyon manat cəlb edilmişdir. 

İcmal büdcə

Cari ilin ilk altı ayında icmal büdcənin gəlirləri 15 milyard 328,9 milyon manat olmuşdur ki, bu da ötən ilin eyni dövrü ilə müqayisədə 2 milyard 958,3 milyon manat və ya 23,9 faiz çoxdur. İcmal büdcənin xərcləri isə 12 milyard 752,4 milyon manat məbləğində icra olunmuşdur.

2021-ci il üzrə icmal büdcə  milyard 335,3 milyon manat məbləğində kəsirlə proqnozlaşdırılsa da,  cari ilin ilk altı ayında faktiki olaraq 2 milyard 576,5 milyon manat büdcə artıqlığı (profisit) yaranmışdır.