OPEC+, neft hasilatını Avqust ayından etibarən gündəlik 400 min barel artırmaq mövzusunda razılaşıb.

Marja xəbər verir ki, bu barədə  OPEC+un Vyanada keçirilmiş yığıncağında qərar verilib. 

Razılaşmaya görə, Birləşmiş Ərəb Əmirliklərinin mövcud 3,2 milyon barel/gün olan istehsal kvotası 3,5 milyon barel/gün səviyyəsinə yüksəldilib.

Səudiyyə Ərəbistanı və Rusiyanın istehsal kvotaları isə bugünki 11 milyon bael/gün səviyyələrindən 11,5 milyon barelə qalxır. İraq və Küveytin isə istehsal kvotaları 150 min barel/gün artırılaraq 4,8 milyon barel/gün və 3 milyon barel/gün səviyyəsinə artırılıb.

Azərbaycan bu ilin sonunadək neft hasilatını hər ay artıracaq

Neft İxrac edən Ölkələr Təşkilatına (OPEC) üzv və qeyri-üzv ölkələrin nazirlərinin 19-cu iclasında gündəlik xam neft hasilatının 2021-ci ilin avqust-dekabr aylarında hər ay 400 min barrel artırılmasına, gələn ilin mayından etibarən neft hasilatının baza səviyyəsinə qismən düzəlişlər edilməklə “Əməkdaşlıq Bəyannaməsi”nin müddətinin 2022-ci ilin sonunadək uzadılmasına dair qəbul edilmiş qərarı Azərbaycan da dəstəkləyib.

Bu barədə Marja-ya Energetika Nazirliyindən məlumat verilib.

Məlumata görə, yeni “Əməkdaşlıq Bəyannaməsi” Azərbaycanda gündəlik xam neft hasilatının avqustdan ilin sonunadək hər ay müvafiq həcmdə artırılmasını, ixtisarlarla bağlı öhdəliklərinin də uyğun şəkildə azaldılmasını nəzərdə tutur. 2022-ci ilin mayından ilin sonunadək isə Azərbaycanın neft istehsalı üzrə öhdəliklərin hesablanması mövcud baza əsasında davam etdiriləcək. Yəni, ölkəmizdə 2018-ci ilin oktyabrındakı 718 min barrelik gündəlik xam neft hasilatı gələn il də hasilat səviyyəsinin müəyyənləşdirilməsində baza olaraq qalacaqdır.

İclasda iştirak edən energetika naziri Pərviz Şahbazov “OPEC plus”un qlobal neft bazarının balanslaşdırılması prosesinə töhfə verəcək bu yeni qərarına Azərbaycanın dəstəyini ifadə edib.

Qeyd edək ki, yeni razılaşma, “OPEC plus” ölkələri üzrə mövcud 5,8 mln. barrel həcmində ixtisarların 2021-ci ilin sonunadək 2 mln. barrel azaldılmasını nəzərdə tutur.

İclasda OPEC və qeyri-OPEC ölkələri nazirlərinin növbəti iclasının 2021-ci ilin 1 sentyabr tarixində keçirilməsi qərara alınıb.