ABŞ-ın Energetika Nazirliyi yanında Energetika İnformasiyası Administrasiyası (EIA) "Brent" markalı neftin qiyməti üzrə proqnozunu yüksəldib.

EIA-in aylıq hesabatına görə, 2021-ci ildə sözügedən markalı neftin ortalama qiymətinin 68,78 dollar səviyyəsində olacağı gözlənilir, bu, əvvəlki proqnozla müqayisədə 3,59 dollar çoxdur.

Proqnoza görə, 2021-ci ilin ikinci yarısında "Brent" markalı neftin ortalama qiyməti 72 dollar səviyyəsində olacaq.

EIA-in proqnozuna əsasən, 2022-ci ildə "Brent" neftinin qiyməti 66,64 dollar səviyyəsində olacağı gözlənilir (6,15 dollarlıq artım).

EIA-in hesablamalarına görə, ötən il "Brent" markalı neftin bir barelinin orta qiyməti 41,69 dollar olub.

Hesabata əsasən, WTI markalı neftin orta qiyməti 2021-ci ildə 65,85 dollar (ötən proqnoza əsasən 61,85 dollar) səviyyəsində olacağı proqnozlaşdırılır. 2022-ci ildə isə bu göstəricinin 62,97 dollara çatacağı gözlənilir (öncəki proqnoz 56,74 dollar səviyyəsində olub).

Hesabatda həmçinin qeyd olunur ki, ötən il WTI markalı neftin orta qiyməti 39,17 dollar təşkil edib.

Azərbaycanın neft hasilatı üzrə proqnozunu azaldıb

ABŞ-ın Energetika Nazirliyi yanında Energetika İnformasiyası Administrasiyası (EIA) Azərbaycanda 2021-2022-ci illər üçün gündəlik neft və digər maye karbohidrogenlərin hasilatı üzrə proqnozunu azaldıb.

Hesabata görə, bu il Azərbaycanda gündəlik neft və digər maye karbohidrogenlərin hasilatı 720 min barel təşkil edəcək ki, bu da əvvəlki proqnozdan (iyun ayında verilib – red.) 10 min barel azdır.

Qurumun proqnozuna görə, 2022-ci ildə ölkədə gündəlik neft hasilatı artaraq 760 min barel təşkil edəcək. Bu, iyunda verilən proqnozla müqayisədə 20 min barel azdır.

EIA-in göstəricilərinə əsasən, ötən il Azərbaycanda orta gündəlik neft və digər maye karbohidrogenlər hasilatı 700 min barel səviyyəsində olub.

Marja.az Telegramda: https://t.me/marjaaz

APA