“Cənub Qaz Dəhlizi” QSC 2020-ci ili 13 milyon 72 min ABŞ dolları mənfəətlə başa vurub. Halbuki, səhmdar cəmiyyəti 2019-cu ildən 280 milyon 751 min dollar zərərlə çıxmışdı.

Ötən il “Cənub Qaz Dəhlizi”nin əməliyyat gəlirləri 861 milyon 551 min dollar (əvvəlki ilə nisbətən 90,35% çox), satışının maya dəyəri 295 milyon 534 min dollar (19,5% çox), ümumi və inzibati xərcləri 212 milyon 832 min dollar (2,2 dəfə çox), nəqletmə xərcləri 18 milyon 169 min dollar (3,4 dəfə çox), faiz gəlirləri 37 milyon 358 min dollar (16,3% az), asılı müəssisələrdən gəlirləri 17 milyon 265 min dollar (əvvəlki il olmayıb), digər gəlirləri 28 milyon 722 min dollar (25,8% çox), maliyyə xərcləri 395 milyon 505 min dollar (10,1% az), məzənnə fərqindən zərəri 1 milyon 649 min dollar (41,4% az), mənfəət vergisi ödəmələri isə 8 milyon 135 min dollar (7,6 dəfə çox) təşkil edib.

Bu il yanvarın 1-nə “Cənub Qaz Dəhlizi”nin aktivləri 12 milyard 676 milyon 671 min dollar olub ki, bu da illik müqayisədə 0,2% çoxdur. Hesabat dövründə şirkətin öhdəlikləri cüzi artaraq 9 milyard 449 milyon 76 min dollara, balans kapitalı isə 0,6% artaraq 3 milyard  227 milyon 595 min dollara çatıb.

Xatırladaq ki, “Cənub Qaz Dəhlizi” ölkə prezidentinin “Şahdəniz qaz-kondensat yatağının istismarının ikinci mərhələsi və Cənub Qaz Dəhlizinin yaradılmasına dair digər layihələrlə bağlı bəzi tədbirlər haqqında” 25 fevral 2014-cü il tarixli sərəncamı əsasında,“Şahdəniz” qaz-kondensat yatağının tam miqyaslı istismarı, Cənubi Qafqaz Boru Kəmərinin (CQBK) genişləndirilməsi, Trans-Anadolu Boru Kəməri (TANAP) və Trans-Adriatik Boru Kəməri (TAP) layihələrində dövlətin iştirak paylarının birləşdirilməsi, idarə edilməsi və maliyyələşdirilməsi məqsədi ilə yaradılıb. Onun nizamnamə kapitalı 2 milyard 415 milyon 800 min dollardır. Şirkətin səhmlərinin 51%-i İqtisadiyyat Nazirliyinə, 49%-i isə Dövlət Neft Şirkətinə (SOCAR) məxsusdur.

Marja.az Telegramda: https://t.me/marjaaz

Report