(®️) Abşeron Logistika Mərkəzi logistika və ticarətin inkişafına dair müəyyən edilmiş hədəfə uyğun olaraq, yük dövriyyəsinin artırılması, tranzit yüklərin cəlb edilməsi və həmin yüklər üzərində əlavə dəyər yaradılması istiqamətində bir sıra strateji layihələr həyata keçirir. Hal-hazırda Mərkəzdə gömrük rejimlərinin effektiv tətbiqi ilə qonşu ölkələrin gömrüklü anbarlarında saxlanılan yük həcmlərinin bir qisminin ölkəyə cəlb edilməsi məqsədilə tranzit yüklərin emalından və re-eksport rejimindən yararlana biləcək bir çox beynəlxalq şirkətlərlə danışıqlar aparılır. Həmçinin daşınan yüklərin dəmiryoluna cəlb edilməsi vasitəsilə ölkədə dəmiryolu ilə daşınan yüklərin həcminin artırılması hədəflənmişdir.

Qeyd etmək istərdik ki, mərkəz tranzit yüklərin cəlbində əhəmiyyətli rol oynayan gömrük anbar rejiminin tətbiqinə keçən aydan etibarən start verib. Gömrük anbarı rejiminin əsas xüsusiyyəti yüklərin gömrük rüsumları, əlavə dəyər vergisi alınmadan gömrük anbarlarında yerləşdirilə və müəyyən müddətə qədər saxlanıla bilməsidir.

Gömrük anbarlarına böyük həcmdə gələn yüklər çeşidləmə, qablaşdırma və emal əməliyyatlarından keçirilərək daha sonra ixrac imkanlarının mövcud olması, həmçinin yüklərin vergi ödəmədən və ticarət siyasəti tədbirləri tətbiq olunmadan təkrar ixrac olunana qədər saxlanılması tranzit yüklərin cəlb edilməsində əhəmiyyətli rol oynayır.

Bu xidmətdən yararlanmaq istəyən sahibkarlar  Abşeron Logistika Mərkəzinin www.absheronport.az web-səhifəsinə və info@absheronport.az mail ünvanına müraciət edə, həmçinin (+994 12) 404 76 00, (+994 50) 555 52 52 məlumat mərkəzi ilə əlaqə saxlaya bilərlər.

Abşeron Logistika Mərkəzi tranzit yüklərin gömrük anbarlarında qəbulu üçün zəruri olan bütün infrastruktura malikdir. Belə ki, mərkəz “A+” kateqoriyalı, “WMS” proqram təminatı ilə təchiz olunmuş anbar kompleksinə sahibdir. 65,7 ha ərazini əhatə edən Mərkəzdə konteyner və vaqon daşımaları, ölkədaxili daşıma, anbar, gömrük və broker xidmətləri təklif olunur. Mərkəzdə yaradılmış “bir pəncərə” sistemi və ərazisində “Abşeron” gömrük postunun yerləşməsi sahibkarlar üçün şəffaf şəraitin yaradılması, rahatlığın təmin edilməsinə zəmin yaradır.