Bir barel neftin qiyməti 2014-cü ildəki 110 dollardan 2020-ci ildə mənfi səviyyələrə düşmüşdü. Sonradan qiymətlər yüksəlsə də 2014-cü illə müqayisədə kəskin aşağıdır. Uzun müddətdir aşağı qalan neft qiymətləri Rusiyada yeni yataqlar axtarışını zərərli edib.

Marja xəbər verir ki, "Rosgeology"nin rəhbəri Sergey Qorkov, TASS-a verdiyi müsahibəsində, neft şirkətləri üçün kəşfiyyat işlərinin gəlirlilik nöqtəsinin bir barel üçün təxminən 70 dollar olduğunu söyləyib.

“Təcrübənin göstərdiyi kimi, bir barel üçün 70 dollar civarındadır. 65-70 dollarlıq qiymət, təəssüf ki, geologiyaya az diqqət yetirilən bir intervaldır”, - deyib.

Rusiya Maliyyə Nazirliyinə görə, 2020-ci ildə Rusiyanın "Urals" markalı neftinin orta illik qiyməti bir barel üçün 41,73 dollar, 2019-cu ildə 63,59 dollar, 2018-ci ildə 70,01 dollar, 2017-ci ildə 53,05 dollar, 2016-cı ildə 41,9 dollar, 2015-ci ildə  51,23 dollar təşkil edib. Beləliklə, son altı ildən yalnız 2018-ci ildə  "Urals"ın dəyəri kəşfiyyat işlərinin gəlirlilik nöqtəsinə yaxınlaşıb və dörd il ərzində kritik həddən 20-40% aşağı olub. Bu, neft işçilərini Qərb texnologiyalarından uzaqlaşdıran sanksiyalarla yanaşı, yeni neft axtarışı keyfiyyətinə təsir edib.

Rusiya Energetika Nazirliyinin məlumatına görə, 2015-2019-cu illərdə aşkar edilmiş yataqların orta ehtiyatı 9-14 milyon ton təşkil edib. Müqayisə üçün: Rusiya hər il  550 milyon ton neft hasil edir. 

Qorkov, geoloji kəşfiyyata investisiyaların azalmasının gələcəkdə təsdiq olunmuş neft ehtiyatlarının həcminə təsir göstərə biləcəyini söyləyib.

Rusiya Energetika Nazirliyinin məlumatına görə, 2021-ci ilin əvvəlində Rusiyada neft ehtiyatlarının 30 milyard ton olduğu təxmin edilir. Energetika nazirinin müavini Pavel Sorokin yanvar ayında demişdir ki, bu həcmin yalnız 36%-i cari qiymətlərlə sərfəlidir. Sərfəli olarsa Rusiyadakı ümumi neft ehtiyatları 58 illik istehsal üçün kifayət edə bilər.