2021-ci il mayın 1-i vəziyyətinə ilkin məlumatlara əsasən iqtisadi fəal əhalinin sayı 5 milyon 264,2 min nəfər olmuş, onlardan 4 milyon 898,7 min nəfərini məşğul, 365.5 min nəfərini işsiz əhali təşkil etmişdir.

Marja xəbər verir ki, bu, Dövlət Statistika Komitəsinin aylıq hesabatından məlum olur.

İşsizlik nisbəti 6,9% olub.

Cari il aprelin 1-i vəziyyətinə muzdla çalışan işçilərin sayı 1 milyon 679,7 min nəfər, o cümlədən iqtisadiyyatın dövlət sektorunda 915,3 min nəfər, qeyri-dövlət sektorunda isə 764,4 min nəfər təşkil etmişdir. İqtisadiyyatın neft-qaz sektorunda 33+ min nəfər, qeyri neft-qaz sektorunda isə 1 milyon 646,7 min nəfər çalışmışdır.

Müəssisə və təşkilatlarda muzdla çalışan işçilərin 23,5 faizi məhsul istehsalı sahələrində, o cümlədən 7,4 faizi emal sənayesində, 7,2 faizi tikintidə, 3,4 faizi kənd təsərrüfatı, meşə təsərrüfatı və balıqçılıq sahələrində, 2,0 faizi mədənçıxarma sənayesində, 1,9 faizi su təchizatı, tullantıların təmizlənməsi və emalı, 1,6 faizi elektrik enerjisi, qaz və buxar istehsalı, bölüşdürülməsi və təchizatı sahələrində məşğul olmuşdur.

Xidmət sahəsində işləyənlərin 19,7 faizi təhsil, 18,5 faizi ticarət; nəqliyyat vasitələrinin təmiri, 8,3 faizi əhaliyə səhiyyə və sosial xidmətlərin göstərilməsi, 6,7 faizi dövlət idarəetməsi və müdafiə; sosial təminat, 5,3 faizi inzibati və yardımçı xidmətlərin göstərilməsi, 4,5 faizi nəqliyyat və anbar təsərrüfatı, 3,4 faizi peşə, elmi və texniki fəaliyyət, 3,2 faizi istirahət, əyləncə və incəsənət, 1,8 faizi informasiya və rabitə, 1,7 faizi maliyyə və sığorta fəaliyyəti, 1,4 faizi turistlərin yerləşdirilməsi və ictimai iaşə, 1,1 faizi digər sahələrdə xidmətlərin göstərilməsi və 0,9 faizi daşınmaz əmlakla əlaqədar əməliyyatlar sahələrində çalışmışlar.

2021-ci ilin I rübünün sonuna ölkə ərazisində haqqı ödənilən əmək fəaliyyəti ilə məşğul olmaq üçün verilmiş və müddəti uzadılmış iş icazələrindən qüvvədə olanlara malik olan əcnəbilərin və vətəndaşlığı olmayan şəxslərin sayı 1480 nəfər olmuşdur. Onlardan 39,7 faizi tikintidə, 17,0 faizi mədənçıxarma sənayesində, 8,4 faizi emal sənayesində, 6,7 faizi ticarət; nəqliyyat vasitələrinin təmiri, 5,5 faizi turistlərin yerləşdirilməsi və ictimai iaşə, 4,1 faizi kənd təsərrüfatı, meşə təsərrüfatı və balıqçılıq və 18,6 faizi digər sahələrdə məşğul olmaq üçün iş icazələrinə malik olmuşdur.

Xatırladaq ki, 2021-ci il yanvarın 1-i vəziyyətinə iqtisadi fəal əhalinin sayı 5 milyon 252,5 min nəfər olmuş, onlardan 4 milyon 876,6 min nəfərini məşğul əhali təşkil etmişdi. Rəsmi işsizlərin sayı 375,9 min nəfər, işsizlik nisbəti 7,2% təşkil etmişdi.