ABŞ-ın qlobal avtomobil istehsalçısı Ford Motors iyun ayından etibarən Şimali Amerikadakı 8 zavodunda müxtəlif vaxtlarda istehsalı müvəqqəti dayandıracağını açıqlayıb.

Marja xəbər verir ki, Şirkət istehsal planlarına dair daxili məlumat bülletenində yarımkeçirici çiplərin təchizatındakı ləngiməyə görə Mustang və Escape krossoverlərindən tutmuş ən çox satılan F-150 pikaplarına və Bronco Sport SUV-larına qədər əksər modellərin buraxılmasında fasilələr yaranacağı barədə xəbərdarlıq edib: “Biz əlimizdəki yarımkeçiri elementlərin səmərəli paylanmasında maksimum səy göstərəcəyik və dilerlərimizi və müştərilərimizi mümkün qədər çox sayda yüksək keyfiyyətli avtomobillərlə təchiz etməyə çalışacağıq.”

Maraqlıdır ki, Fordun istehsalda fasilələr etmək qərarı prezident Baydenin Miçiqandakı Dearborn zavoda səfərindən bir gün sonra verilib. ABŞ rəhbəri səfər çərçivəsində gələn ildən istehsal edilməyə başlanacaq F-150 modelinin elektrikli versiyası ilə tanış olmuş və bir daha yerli çip istehsalçılarına maksimum dəstəyin vacibliyini vurğulamışdı.

İstehsalın dayandırılacağı zavodlar bunlardır:

İllioinsdəki Çikaqo yığma zavodu mayın 31-də tamamilə dayanacaq və iyunun 7-dən başlayan həftədə məhdud həcmdə istehsalata davam edəcək;

Miçiqandakı Flat Rock yığma zavodu mayın 31-dən iyunun 13-ə qədər işləməyəcək;

Miçiqandakı Dearborn yük maşınları zavodu və Kanzas-Sitidəki yığma xətti 31 may-13 iyun tarixlərində işləməyəcək, iyunun 14-dən məhdud qrafiklə istehsalata davam edəcək;

Meksikadakı Hermosillo yığma zavodu 21 iyun-4 iyul tarixlərində dayanacaq;

Kentukkidəki Luisvill yığma zavodu mayın 31-dən iyulun ortasına qədər dayanacaq, bu həm də planlaşdırılan yay fasilə dövrü ilə əlaqədardır;

Kanadada Oakvill yığma kompleksi 31 may-28 iyun tarixlərində bağlı olacaq;

Ohion zavodu 31 may-20 iyun tarixlərində yalnız Super Duty Chassis yük kabrioletlərini və Medium Duty modelli yük maşınlarını buraxacaq.

Bir neçə həftə öncə Ford-un baş direktoru investorları bu ilin ikinci rübündə nəzərdə tutulan istehsal həcminin 50% itiriləcəyi barədə xəbərdar etmişdi. Birinci rübdə itirilən istehsal həcmi 17%-ə bərabər idi. Ford 2021-ci il üzrə proqnozunda gəlirlərinin 2,5 milyard dollar azalacağını bildirib.