FAO Qida Qiyməti İndeksi, fasiləsiz 11 aydır yüksəlişini davam etdirir. Marja xəbər verir ki, İndeksdə son 10 ilin ən uzunmüddətli yüksəlişi yaşanır. İndeks sonuncu dəfə, İyul 2010 - Fevral 2011 arasında 8 ay fasiləsiz yüksəliş qeyd etmişdi.

FAO Qida Qiyməti İndeksi, Aprel ayında aylıq müqayisədə 1,7%, illik müqayisədə 30.8% yüksəlib. Keçən ilin Aprel ayında 92,4 səviyyəsində olan İndeks, bu ilin Aprel ayında 120.9 səviyyəsinə çatıb. Şəkər qiymətlərindəki kəskin yüksəliş, apreldə indeksin artımasına təsir edib.

Geniş şəkildə ticarət olunan qida məhsullarının beynəlxalq qiymətlərindəki aylıq dəyişiklikləri izləyən İndeks, 11 aydır yüksəlişini davam etdirir və 2014-ci ilin May ayından bu yana ən yüksək səviyyəyə çıxıb. 

Mart ayı üçün 118,5 olaraq açıqlanan İndeks, 118,9-a revizə edilib.

Dünyada qarğıdalı, soya, bitki yağları, süd, kərəyağı bahalaşır.

FAO Taxıl Qiyməti İndeksi, Apreldə aylıq müqayisədə 1,2%, illik müqayisədə 26% yüksəlib. Argentina, Braziliya və ABŞ-da əkin və iqlim qaynaqlı narahatlıqlar qarğıdalı qiymətlərini aylıq müqayisədə 5,7%, illik müqayisədə 66,7% artırıb. Apreldə buğda qiymətləri sabit qalıb. Qlobal düyü qiymətləri isə geriləyib. Arpa qiymətlərində də cüzi geriləmə olub.

Bitki mənşəli Yağ Qiyməti İndeksi, beynəlxalq palma yağı qiymətlərinin böyük ixracatçı ölkələrdəki istehsal artımının gözləniləndən daha yavaş olacağı narahatlıqlarına bağlı olaraq Aprel ayında 1.8% artıb. İndeksin artmasına soya qiymətlərindəki artım da təsir edib.  Günəbaxan yağı qiyməti cüzi düşüb. 

Süd Qiyməti İndeksi kərəyağı, yağsız süd tozu və pendirə Asiyanın güclü tələbilə 1,2% yüksəlib

Ət Qiyməti İndeksi 1.7% artıb. Artan tələb qiymətlərdə yüksəlişə səbəb olub. 

Şəkər Qiyməti İndeksi, aylıq müqayisədə 3,9% artarkən, illik müqayisədə 60% yüksəlib. Braziliyada şəkər yığımının yavaşlaması və Fransada yaşanan don ziyanına dair narahatlıqlar, qlobal şəkər təklifinə dair narahatlıqları artırıb.