Ötən ilin əvvəlindən başlayaraq Azərbaycanda hər bir vətəndaşa şəxsiyyət vəsiqəsilə 20 min manat ekvivalentində (11 min 750 dollar) xarici valyuta satışı həyata keçirilir. Limiti aşan vətəndaşlara bildirilmişdi ki, 1 il (12 ay) ərzində bu limiti keçənlərə banklar tərəfindən xarici valyuta satışı həyata keçirilməyəcək, limit yalnız 12 ay başa çatdıqdan sonra sıfırlanacaqdır.

Marja.az-ın məlumatına görə, hazırda 12 ay müddəti başa çatmış və buna görə banklara Dollar almaq üçün müraciət edən vətəndaşlara bildirilir ki, limit Mərkəzi Bank tərəfindən sıfırlanmayıb, bu səbəbdən şəxsiyyət vəsiqəsilə Dollar alışı mümkün olmayacaqdır. Dollar almaq üçün gəlirlər haqqında sənədlər (ev alqı-satqısı müqaviləsi, avtomobil satışının sənədləri və digər rəsmi gəlir sənədləri) təqdim edilməlidir. Təqdim edilən sənədlər Mərkəzi Banka göndərilir, qərar müsbət olarsa bank tərəfindən xarici valyuta satıla bilər. Həmçinin, əlavə məlumat almaq üçün Mərkəzi Banka müraciət etmək məsləhətdir.

Mərkəzi Bankın Qaynar xətinə müraciət edilən vətəndaşlara bildirilir ki, xarici valyutanın alqı-satqısının məhdudlaşdırılması ilə bağlı Mərkəzi Bankın hər hansı bir rəsmi qərarı yoxdur. Xarici valyutanın satılmaması ilə bağlı qərər banklar tərəfindən qəbul edilir, qərardan narazı olan hər bir vətəndaş Mərkəzi Banka yazılı formada müraciət edə bilər.

“Mərkəzi Bank tərəfindən limit ilə bağlı hər hansı bir rəsmi qərar yoxdur. Vətəndaş zəruri sənədləri təqdim etməklə valyuta mübadiləsini həyata keçirə bilər. Əgər sizə imtina olunubsa, yazılı formada Mərkəzi Banka müraciət edin, araşdırılma aparılsın və Sizə rəsmi cavab verilsin”, - Mərkəzi Bankın Qaynar xəttindən vətəndaşlardan birinin müraciətinə cavab olaraq bildirilib.

Banklardan qeyri-rəsmi şəkildə vətəndaşlara bildirilir ki, məhdudiyyət bankların qərarı deyil, Mərkəzi Bank tərəfindən tapşırılıb, məqsəd ölkədə Dollar satışını minimuma endirməkdir.

Qısası, 2020-ci ilin əvvəlindən bu yana Azərbaycanda banklardan 11 min 750 dollar almış vətəndaş qeyri-müəyyən müddətədək şəxsiyyət vəsiqəsini təqdim edərək ABŞ valyutası ala bilməyəcəkdir. Dollar almaq istəyən vətəndaş banka gəlirlər haqqında sənədlər təqdim etməlidir. Bu sənədləri təqdim edə bilməyənlər ABŞ valyutası əldə edə bilməyəcəklər.

Təəssüf doğuran budur ki, banklarda vətəndaşa bir rəsmi qərar təqdim edilmir. Məlumata görə, Mərkəzi Banka sənədlər ilə müraciət edən vətəndaşlara da adətən imtina cavabı verilir. Belə ki, gəlirləri və vergi ödədiyi barədə bank hesabından çıxarış sənədi təqdim edən vətəndaşa xarici valyuta satışından imtina olunur. Guya bu tədbirlər ölkədə çirkli pulların yuyulmasının qarşısının almasına xidmət edir.

Fakt budur ki, ölkədə xarici valyuta satışının məhdudlaşdırılmasına qarşı tədbirlər qeyri-peşəkar aparılır. Mərkəzi Bankın məhdudiyyətləri “qara bazar”ın yaranmasına səbəb olub. Azərbaycanda bir çox ünvanda, o cümlədən iri ticarət mərkəzlərində xarici valyutanın qanunsuz alqı-satqısı ilə məşğul olanların sayı artır. Bu şəxslərdən istənilən məbləğdə ABŞ valyutası almaq mümkündür. 

AYDA 59 MANAT ÖDƏNİŞLƏ 1500 AZN KREDİT!