Apple-dan iri investisiya – 1 milyard dollar, 3 min iş yeri

Şirkət Şimali Karolinada yeni istehsal müəssisəsi açır.

Apple-dan iri investisiya – 1 milyard dollar, 3 min iş yeri

ABŞ texnologiya nəhənglərindən olan Apple bugünkü açıqlamasında Raleigh, Şimali Karolinada yeni istehsal müəssisəsi açmaq planlarındna bəhs edib.

Marja xəbər verir ki, proqram mühəndisliyi və maşınla öyrənmə sahəsində çalışacaq 3 min işçi üçün yeni kampus 1 milyard dollara başa gələcək.

Yeni investisiya şirkətin aparıcı istehsal sahələrini əsas mühəndislik bölmələrinin və baş qərargahının yerləşdiyi Kupertino, Kaliforniyadan çıxararaq, digər bölgələrə doğru genişlənmək siyasətinin tərkib hissəsidir. 1 milyard dollarlıq daha bir kampusun isə gələn il Austin, Texasda açılması gözlənilir. Apple-ın əsas genişlənmə sahələri öz adını yaxınlıqdakı Şimali Karolina Dövlət Universitetindən, Duke Universitetindən və Şimali Karolina Universitetindən götürmüş Tədqiqat Üçbucağında yerləşəcək. Şirkətin Baş direktoru Tim Kuuk, Baş əməliyyat direktoru Ceff Uilyams və böyük vitse-prezident Eddi Kue Duke Universitetinin məzunlarıdır.

Apple bununla da, mənzil qiymətləri və digər xidmətlərin daha baha olduğu San-Fransisko körfəzindən daha ucuz bölgələrə köçmək qərarına gələn digər Silikon Vadisi şirkətlərinin yolunu tutub. Misal üçün, Oracle hələ ötən il öz qərargahını Austin, Texasa köçürəcəyini açıqlayıb. Google Nyu-York Sitidə bir milyard dollarlıq yeni kampus tikir və Los-Ancelesdəki ticarət mərkəzini yenidən qurur. Amazonun Arlinqton, Virciniyadakı ikinci böyük qərargahında isə planlaşdırılan 25 min işçi əvəzinə cəmi 1600 nəfər çalışır.

Apple həmçinin 2026-cı ilə qədər San-Diyeqo, Kaliforniyada 5 min, Los-Ancelesdəki Kulver Sitidə 3 min, Koloradoda 700 nəfəri işə götürməyi, Seattle, Vaşinqtondakı min əməkdaşın sayın 2 min nəfərə çatdırmağı və ümumilikdə növbəti 5 illik dövrdə əlavə 20 min iş yeri açmağı planlaşdırdığını bildirib. Şirkətin hazırda təxminən 147 min nəfər işçisi var.

26.04.2021 16:47

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az