ABŞ-ın transmilli oyuncaq istehsalçısı, “Barbie”, “Monster High”, “Polly Pocket”, “Hot Wheels”, “American Girl”, “Matchbox”, “Masters of Universe”, “Thomas&Friends” kimi məşhur brend və seriyaların sahibi, Danimarkanın Lego Group şirkətindən sonra dünyada gəlirlərinə görə ikinci ən böyük oyuncaq firması olan 76 yaşlı qocaman Mattel Inc. ötən gün investorlar və ictimaiyyət üçün 2021-ci ilin birinci rübünün nəticələrini açıqlayıb. Marja xəbər verir ki, ötən ilin müvafiq dövrü ilə müqayisədə 47% artan satışlar son 6 ilin ən yaxşı nəticələrini göstərib.             

Gəlirlərin ümumi həcmi ötən ilin müvafiq dövründə qeydə alınmış 594 milyon dollarla müqayisədə artaraq, 874 milyon dollara çatıb və analitiklərin proqnozlarından da (684 milyon dollar) xeyli artıq olub. Əməliyyat mənfəəti  31 milyon dollar təşkil edib ki, bu da 2014-cü ildən bəri ən yaxşı rüblük göstəricidir. Şirkət bu rübü xalis mənfəət əldə etməyərək, 115,2 milyon dollar zərərlə (hər səhmə görə 33 sent) başa vurub, lakin ötən ilin birinci rübündə tətbiq edilən ilk karantin tədbirlərinin təsiri nəticəsində məruz qaldığı 210,7 milyon dollar (hər səhmə görə 61 sent) zərərlə müqayisədə vəziyyət nisbətən sabitdir.

Satışların 381 milyon dolları gəlinciklərin, 183 milyon dolları körpələr, bir yaşından yuxarı və məktəbəqədər yaşdakı uşaqlar üçün oyuncaqların, 215 milyon dolları müxtəlif arabalar və bu tipli oyuncaqların, 199 milyon dolları müxtəlif film və cizgi filmi qəhrəmanlarının, qurucu oyunların, uşaqların inkişafı üçün oyunların və digər məhsulların payına düşüb. “Barbie” gəlinciklərinin satışı 86%, “American girl” 22% artıb. “Jurassic World”, “WWE” və “Masters of Universe” kimi film və animasiya qəhrəmanlarının satışı isə rekord – 101% artıb.

Mattel-in baş direktoru Ynon Kreiz cari ilin ikinci rübünün, xüsusilə Pasxa tətilinin də inamlı göstəricilərlə başladığını, bu il bayram mövsümlərində daha yaxşı nəticələr əldə edəcəklərini bildirib: “Biz oyuncaq sənayesində davamlı lider kimi öz mövqelərimizi möhkəmləndiririk. 2021-ci ildə və daha sonra gəlirlilik imkanlarımızı daha da artırmaq və davamlı olaraq böyümək mövqeyindəyik”.

Kommersiya qrupu Toy Assosiation-un apardığı “Kids Global” adlı araşdırmanın nəticələrinə əsasən, ABŞ-dakı valideynlərin 52 faizi bayramlarda uşaqlara daha çox oyuncaq hədiyyə edib. Bu da sektorun əsas oyunçularından biri Mattel-in satışlarına müsbət təsir edən əsas amillərdəndir. Şirkətin səhmləri dünən 7% bahalaşaraq, bir səhmə görə 22,33 dollara çatıb.