ABŞ-ın alternativ investisiyalar şirkəti, 2020-ci ildə idarəçiliyi altındakı aktivlərin həcmi 619 milyard dollar təşkil edən Blackstone Group Avstraliyanın kazino operatoru Crown Resorts Ltd.-ni almaq üçün yenilənmiş qiymət təklifi təqdim edib.

Marja xəbər verir ki, hazırda mütəşəkkil cinayətkar qruplarla müəyyən əlaqələrinin olması şübhəsi ilə Avstraliya hüquq-mühafizə orqanları tərəfindən haqqında iki ştatda  - Viktoriya və Qərbi Avstraliyada araşdırmalara başlanan şirkət üçün bu təklif xilas planı deməkdir. Artıq digər iri şəhərdə  - Sidneydə Crown Resort-un kazino fəaliyyəti dondurulub.

Hazırda kazino operatorunun səhmlərinin 10%-nə malik Blackstone Group ötən ay qalan payların 37%-ni satın almaq üçün bir səhmə görə 11,85 Avstraliya dolları təklif etmişdi. Bu isə Crown Resortsun bazar dəyərini təxminən 8 milyard Avstraliya dollarına (6,1 milyard dollar) yüksəldib. Bununla da şirkətin təsisçisi Ceyms Parker təxminən 2,9 milyard Avstraliya dolları (2,2 milyard dollar) qazanacaq. 

2007-ci ildə daha çox media və əyləncəli oyunlar şirkəti kimi “Publishing & Broadcasting Limited” adı ilə qurulan Crown Resorts hazırda Asvtraliyanın ən böyük qumar və əyləncəli oyunlar operatoru və Melburn, Sidney, Bursvud kimi şəhərlərdə bahalı kazinoların sahibidir. 2008-ci ldə dünyanın qumar və əyləncəli oyunlar mərkəzi Las-Veqasda möhkəmlənmək üçün Cənubi Floridadakı hotel və kazino şirkəti Fontainebleau Resortsun 19 faizini 250 milyon dollara alsa da, növbəti il ABŞ operatorunun digər investorları öz sərmayələrini geri çəkdilər və Crown Resorts iri məbləğdə ziyana məruz qaldı. 2014-cü ildə Las-Veqasda başqa bir oteli 280 milyon dollara alan Crown Resorts ABŞ-ın ən bahalı otellərindən birini -  6 milyard dollara başa gələcək “Alon Las-Veqas”ı tikib 2018-ci ildə istifadəyə verəcəyəni elan etdi. Lakin 2016-cı ildə tikinti işləri dayandırıldı və Crown bu dəfə ABŞ bazarını birdəfəlik tərk etdi.

Blacstone Group ilə sövdələşmənin bu ilin 3-cü rübündə yekunlaşacağı gözlənilir. Həmçinin, hüquq-mühafizə orqanları tərəfindən aparılan araşdırmaların nəticələri avqust-noyabr aylarında bəlli olacaq. Blackstone hələlik heç bir şərh verməsə də, Crown Resorts təklifin hazırda direktorlar şurasında müzakirə edildiyini bildirib.

(1 dollar   = 1.31 Avstraliya dolları)