Martda ABŞ büdcəsində 660 milyard dollar kəsir yaranıb

Martda ABŞ büdcəsində 660 milyard dollar kəsir yaranıb

ABŞ Maliyyə Nazirliyi Mart ayına dair büdcə məlumatlarını açıqlayıb.

Marja xəbər verir ki, 1 Oktyabr 2020-də başlayan və 30 Sentyabr 2021-də sona çatacaq 2021-ci maliyyə ilinin Mart ayında federal hökumətin büdcə kəsiri 660 milyard dollar təşkil edib.

Bazar proqnozu büdcə kəsirinin 658 milyard dollar olacağı istiqamətində idi. Büdcədə keçən ilin eyni ayında 119 milyard dollar kəsir yaranmışdı.

Bu dövrdə büdcə xərcləri keçən ilin eyni ayı ilə müqayisədə 160,6% artaraq 927,2 milyard dollara yüksəlib, büdcə gəlirləri 13% artımla 267,6 milyard dollar təşkil edib.

Büdcə kəsirinin Mart ayında artmasına, yeni növ koronavirus (Kovid-19) ilə mübarizə üçün həyata keçirilən 1,9 trilyon dollarlıq iqtisadi dəstək paketi daxilində edilən 339 milyard dollarlıq birbaşa kömək ödəmələri səbəb olub.

Ölkədə, 2021-ci maliyyə ilinin altıncı ayı ərzində cəmi büdcə kəsiri isə keçən ilin eyni dövrü ilə müqayisədə 129,5% artaraq 1,7 trilyon dollar təşkil edib. Büdcə kəsiri keçən ilin eyni dövründə 743,5 milyard dollar səviyyəsində reallaşmışdı.

Maliyyə ilinin ilk 6 ayındakı büdcə xərcləri keçən ilin eyni dövrü ilə müqayisədə 45,3% artaraq 3,4 trilyon dollara yüksəlib, büdcə gəlirləri 6,3% artımla 1,7 trilyon dollar olub.

ABŞ-ın büdcə kəsiri 2020-ci maliyyə ilində Kovid-19 epidemiyasının təsirilə 3,1 trilyon dollarla rekord səviyyəyə çatmışdı.

13.04.2021 07:46