Asiya qitəsi dünyanın ən bahalı bölgəsi və varlanmaq üçün ən əlverişli bazar olaraq qalır.

Marja xəbər verir ki, İsveçrənin özəl bank qrupu, 2020-ci ilin sonuna aktivlərinin həcmi 402 milyard İsveçrə frankı (434,2 milyard dollar) təşkil edən Julius Baer-in yeni dərc etdiyi “Qlobal sərvət və həyat tərzi Hesabatı 2021”-də maraqlı məqamlar üzə çıxıb.

Sərvətinin dəyəri 1 milyon dollardan çox olan varlı və həddən artıq zəngin sakinlərin sayına görə dünyanın 5 ən bahalı şəhərindən 4-ü Asiya qitəsinin payına düşür. Bunlar Şanxay (1-ci yer), Tokio (2-ci yer), Honkonq (3-cü yer) və Taypeydir (5-ci yer). Siyahıda Asiyanın digər varlı şəhərləri də yer alıb: Sinqapur (9-cu yer), Banqkok (11-ci yer), Dubay (12-ci yer), Manila (16-cı yer), Cakarta (20-ci yer), Mumbay (22-ci yer).

Avropa və Orta Şərq qlobal sıralamada 2-ci yeri tutub, çünki bu regionda yerləşən varlı şəhərlərin əksəriyyəti Avro və isveçrə frankı hesabına yüksək alıcılıq qabiliyyətinə malikdir. Siyahıda 8 Avropa şəhəri var: Monako (4-cü yer), Sürix (6-cı yer), Paris (7-ci yer), London (8-ci yer), Milan (13-cü yer), Barselona (15-ci yer), Frankfurt (17-ci yer), Moskva (18-ci yer).  

Amerika qitəsi siyahıda Nyu-York (10-cu yer), Mayami (19-cu yer), Sao Paolo (21-ci yer), Mexiko Siti (23-cü yer) və Vankuverlə (24-cü yer) təmsil olunur. Avstraliya (Sidney, 14-cü yer) və Afrika (Yohannesbur, 25-ci yer) qitələri müvafiq olaraq hərəsi bir nümayəndəyə malikdir.

Qlobal reytinq dünyanın ən varlı 25 şəhərindəki zəngin insanların daha çox aldığı lüks malların daxil olduğu səbətin qiymətlərinə əsaslanır. Pandemiya səbəbindən yaşam tərzlərində və davranışlarında müəyyən dəyişikliklər yaşayan zənginlər fərdi idman müəllimlərini, toy buketlərini, Botoks həkimlərini və bahalı pianoları velisopedlər, qaçış kəmərləri sağlamlıq sığortası və texnologiya paketləri, o cümlədən güclü noutbuklar və smartfonlarla əvəz ediblər.

Ümumilikdə qiymətlərinin kəskin şəkildə aşağı düşdüyü lüks mallara qadın ayaqqabıları (-11,7%), otel nömrələri (-9,3%) və şərablar (-5,3%). Əksinə, biznes klass uçuşları (11,4%), viski (9,9%) və qol saatlarının (6,6%) qiymətləri artıb.