(®️) “AS Group İnvestment” MMC şəhid ailələrinə bu bayram günlərində xüsusi dəstək, diqqət və qayğı göstərmək üçün bütün bayram ərzində onlarla birlikdə olacaq.

Ötən gün şirkət şəhid çavuş Tağıyev Hüseynin və müharibə başlandığı gündən döyüşlərə könüllü olaraq qatılan Qasımov Eltunun ailələrilə görüşərək onlara maddi dəstək və bayram sovqatlarıyla qonaq olub. “AS Group İnvestment” şəhid Tağıyev Hüseynin Ramana qəsəbəsindəki Şuşa şəhərciyində dövlət tərəfindən mənzillə təmin edilən ailəsinə çatışmayan məişət əşyaları, maddi yardım və həmçinin martın 28-də 1 yaşı tamam olacaq övladı Nazlıya öz hədiyyələrini çatdırıb. 1991-ci il doğumlu şəhidimiz Tağıyev Hüseyn həm Tovuz döyüşlərində, həm Qazax, həm də İkinci Qarabağ Müharibəsində xüsusi qəhrəmanlıqlarıyla seçilib. Kəşfiyyatçı kimi dövlətimiz və Vətənimiz qarşısında xüsusi xidmətləri olub. “Vətən uğrunda”, “Füzulinin azad edilməsi uğrunda” medallarıyla təltif edilib.

“AS Group İnvestment” MMC-nin bayram günlərində ailəsinə qonaq olduğu digər şəhidimiz 1994-cü il doğumlu Qasımov Eltun 28 sentyabr 2020-ci ildə hərbi komissarlığa yaxınlaşaraq çağırış vərəqəsini götürüb geridə ailəsini və 8 aylıq körpəsini buraxaraq “Oğlum Zeynə qalmasın deyə mən gedirəm bitirməyə” deyib igidliklə döyüşlərə yollanır. Füzuli, Cəbrayıl, Hadrut, Xocəvənd rayonlarının azad edilməsində qəhrəmanlıqla iştirak edir. 18 oktyabr, 2020-ci il tarixində, özünün 26-cı doğum günündə şəhidlik zirvəsinə ucalır. “Vətən uğrunda”, “Xocəvəndin azad edilməsinə görə” medallarıyla təltif olunur.

“AS Group İnvestment” məhz bu bayram günlərində qəhrəman şəhidlərimizin ailələrininin hər kəsdən daha çox diqqətə, qayğıya və dəstəyə ehtiyacı olduğunu düşünərək bu günləri məhz onlarla birlikdə keçirəcək. Sabah isə “AS Group İnvestment” Füzuliyə yola düşür. Bu dəfə oradakı şəhid ailələrilə görüşmək üçün.

Qeyd edək ki, “AS Group İnvestment” bir müddət öncə Mingəçevir rayonunda Park Residence yaşayış binasında şəhid Niyazi İsgəndərovun ailəsinə 3 otaqlı mənzil hədiyyə etmişdir.   

Ümumiyyətlə sentyabrın 27-dən, ölkəmizin ən şanlı tarixi yazılmağa başladığı gündən “AS Group İnvestment” ordumuz, vətəndaşlarımız və dövlətimizə dəstək olmağı özünə borc bilir. Şirkət ön cəbhədə döyüşən əsgərlərimizə, ordumuza və müharibə ərzində düşmən zərbələri nəticəsində evləri dağıdılan, başqa kəndlərə, qəsəbələrə yerləşdirilən vətəndaşlarımıza istər ərzaq təchizatı, istərdə də, balansındakı texnikası ilə dəstək olur.

Bundan başqa  “AS Group İnvestment” şirkəti Vətən müharibəsində canlarından keçən və yaralanan qəhrəmanlarımızın ailələrinə dəstək olmaq məqsədilə yaradılan “Yaşat Fondu”na 150 min manat, işğaldan azad edilmiş ərazilərimizdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması məqsədilə yaradılmış “Qarabağ Dirçəliş Fondu”na isə 300 min manat məbləğində ianə edib.

Şəhid çavuş Hüseyn Tağıyevə aid fotolar

Şəhid Eltun Qasımova aid fotolar