Aktivləri 1 mlrd. manata yaxınlaşır

2016-cı ildə "Azərbaycan Xəzər Dəniz Gəmiçiliyi" QSC-nin aktivləri 901,666 mln. manata çatıb ki, bu da 2015-ci illə müqayisədə 12,17% və 97,823 mln. manat çoxdur.

Bu barədə dövlət şirkətinin konsolidə edilmiş maliyyə hesabatında deyilir. Audit "Ernst and Young Holding CIS B.V." tərəfindən aparılıb.

Aktivlərin 668,835 mln. manatı uzunmüddətli, 232,831 mln. manatı isə cari aktivlərdir. Uzunmüddətli aktivlərin strukturunda 589,163 mln. manatı (+0,56%) gəmilərin, əsas vəsaitlərin, 1,794 mln. manatı (+54,66%) qeyri-maddi aktivlərin, 61,576 mln. manatı uzunmüddətli avans ödənişlərinin, 16,302 mln. manatı (-53%) təxirə salınmış vergi aktivlərinin payına düşür.

Cari aktivlərin strukturuna nəzər saldıqda isə məlum olur ki, burada mal-material ehtiyatlarının payı 63,97 mln. manat (+7,40%), ticarət və digər debitor borclarının payı  143,201 mln. manat (+25,68%), vergilər üzrə debitor borclarının payı 15,306 mln. manat (+4 dəfə), qısamüddətli avans ödənişlərinin payı 6,121 mln. manat (+61,08%), pul vəsaitləri və pul vəsaitlərinin ekvivalentlərinin payı 4,205  mln. manatdır (+5,5 dəfə).

Dövlət şirkətinin öhdəlikləri 14,68% və ya 16,216 mln. manat azalaraq 94,257 mln. manata çatıb ki, bunun da 59,489 mln. manatı cari, 34,768 mln. manatı isə uzunmüddətlidir.

"Azərbaycan Xəzər Dəniz Gəmiçiliyi" QSC-nin ticarət və digər kreditor borcları 37,558 mln. manatdır. 2015-ci ilin sonuna isə bu göstərici 50,051 mln. manat təşkil edib. Bununla yanaşı, dövlət şirkətinin 29,643 mln. manat (2015-ci ilin sonuna 3,819 mln. manat) məbləğində uzunmüddətli kreditləri var.

Hesabat dövründə QSC-nin sosial xərcləri 4,031 mln. manat (+35,5%), ümumi və inzibati xərcləri 60,945 mln. manat (+97,11%), digər əməliyyat xərcləri 18,288 mln. manat (+96,50%) təşkil edib. Qeyd edilən dövr ərzində "Azərbaycan Xəzər Dəniz Gəmiçiliyi"nin maliyyə xərcləri 1,596 mln. manat olub.

Ötən il ərzində dövlət şirkəti gəmilərin, əsas vəsaitlərin silinməsindən 1,245 mln. manatlıq zərər edib.

Şirkət ötən il nizamnamə kapitalını 14,77% və 56,630 mln. manat artıraraq 440,051 mln. manata çatdırıb, məcmu kapital isə 16,45% və ya 114,039 mln. manat artaraq 807,409 mln. manat təşkil edib.
 

2016-cı ildə mənfəət vergisinə 40,158 mln. manat yönəldən QSC hesabat dövrünü 108,266 mln. manatlıq mənfəətlə başa vurub.

© APA