COVİD-19 pandemiyasının təsirinə məruz qalan aztəminatlı ailələrə, həmçinin kiçik kafe və restoranlara dəstək olmaq məqsədilə Coca-Cola və ASAN Könüllüləri Təşkilatı yeni sosial layihəyə start veriblər.

Layihənin tərəfdaşı olan Wolt qida çatdırılması tətbiqində yaradılmış “Bir sifariş – Bir sevinc” (Buy one, donate one) bölməsində xüsusi menyudan edilən hər bir sifariş müqabilində Coca-Cola və ASAN Könülləri bir ailəyə ərzaq yardımı çatdıracaq. 2 ay müddətində davam edəcək bu kampaniya vasitəsilə 7000-dən artıq aztəminatlı ailəyə ərzaq yardımı çatdırılacaq. Hər ərzaq paketinə 18 adda müxtəlif ərzaq məhsulları daxil edilib. 7000 ərzaq yardımının 1500-ü isə kampaniyanın ilk günlərində müharibə dövründə zərərçəkən ailələrə göndəriləcək. “Bir sifariş – Bir sevinc” bölməsinə 20-dən artıq yerli kafe və restoranların yemək sifarişləri daxil edilmişdir. Beləliklə bu kampaniya vasitəsilə sifariş edən hər kəs Azərbaycanda aztəminatlı ailələrə ərzaq yardımı edəcək və ölkədə pandemiya dövründə fəaliyyətinə təhlükə yaranan kafe və restoranları dəstəkləmiş olacaq.

Coca-Cola şirkətinin İctimaiyyətlə əlaqələr və kommunikasiya meneceri Elşad Fərzəliyev “Bir sifariş – Bir sevinc” kampaniyasının unikallığını vurğulayaraq bildirmişdir: “Sosial məsuliyyətli şirkət olan Coca-Cola COVİD-19 pandemiyasının ilk günlərindən başlayaraq ASAN Könüllüləri ilə əməkdaşlıq edərək Azərbaycanda aztəminatlı ailələrə və pandemiya ilə mübarizədə iştirak edən bir çox qurumlara dəstək olmuşdur. Mövcud pandemiyanın mənfi təsirləri davam edərək bir çox sahələrə təsir etmişdir. Bura həm sıravi vətəndaşlar, həm də kiçik sahibkarlar daxildir. Bu çətin durumda cəmiyyətlə həmrəylik göstərərək bir-birimizə dəstək olmaq çox vacibdir. Ümid edirik “Bir sifariş – Bir sevinc” sosial kampaniyası ehtiyacı olanlara dəstək olmaq üçün geniş aksiyaya çevriləcək”.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Könüllülərlə iş sektorunun müdiri Sahil Məmmədli isə pandemiya başlayandan bəri Coca-Cola şirkəti ilə bir neçə layihə həyata keçirdiklərini vurğulayıb:

“Ölkəmizdə pandemiya başlayandan bugünədək Coca-Cola ilə əməkdaşlıq edərək #Birlikdəyik layihəsini icra edirik. Fərdlərə, ailələrə, eləcə də pandemiya ilə mübarizə aparan müxtəlif qurumlara müvafiq yardımlar etmişik. Növbəti layihəmizin özəlliyi isə müharibə dövründə zərərçəkən ailələri əhatə etməmizdir. Layihənin tərəfdaşı olaraq ASAN Könüllüləri bu qrupa daxil olan zərər çəkən ailələrin, Bakı və ətraf bölgələrdə ehtiyacı olan ailələrin müəyyənləşdirilməsi və onlara ərzaq yardımlarının çatdırılması işini öz üzərinə götürüb”.

Qeyd edək ki, bundan əvvəl də COVID – 19 pandemiyası dövründə Coca-Cola ASAN Könüllüləri Təşkilatı ilə birgə “Birlikdəyik” layihəsini həyata keçirib. Layihə çərçivəsində 4000-dən çox aztəminatlı ailə zəruri qida və gigiyena, 20 xəsətəxana və 1000-dən çox tibb personalı isə tibbi ləvazimatlar və antiseptik vasitələrlə təmin edilib. Cari ilin aprel ayının əvvəlində ASAN Könüllüləri Coca-Cola Azərbaycanın dəstəyi ilə ölkə ərazisində karantin rejimində çalışan xəstəxanalar üçün 120,000 su məhsulunun çatdırılmasını təşkil ediblər.