AQTA və “ABAD” publik hüquqi şəxs işğaldan azad olunmuş ərazilərdə yeni layihəyə start verib

Layihənin həyata keçirilməsində əsas məqsəd işğaldan azad olunmuş ərazilərdə əhalinin əsas məşğuliyyətlərindən biri olan heyvandarlığın, həmçinin heyvan kəsimi fəaliyyətinin müasir tələblərə uyğunlaşdırılması, istehlakçıların sağlam ət və ət məhsulları ilə təmin olunması, həmin ərazilərdə fəaliyyət göstərən sahibkarlar üçün əlverişli biznes mühitinin formalaşdırılmasından ibarətdir. İnşa ediləcək yeni heyvan kəsimi məntəqələrində zoonoz xəstəliklərin nəzarətdə saxlanılması, heyvandan insana keçən xəstəliklərin qarşısının alınması ilə yanaşı, həmin ərazilərdə heyvan sağlamlığı və baytarlıq nəzarəti mexanizmlərinin qısa vaxtda təşkil olunması da təmin ediləcək.

Agentliyin İnformasiya təminatı və innovativ həllər şöbəsindən verilən məlumata görə, həmin ərazilərdə yeni heyvan kəsimi məntəqələri Qida Təhlükəsizliyi İnstitutunun vəsaiti hesabına yaradılacaq. Layihə çərçivəsində mikro və kiçik sahibkarlıq subyektləri ilə iş təcrübəsini nəzərə alaraq, “ABAD” publik hüquqi şəxs layihə iştirakçılarının seçimində iştirak edəcək, onların potensialını və biznes idarəetmə səriştəliliyini dəyərləndirib, ət kəsimi sahəsi üzrə “ABAD”çılar yetişdirəcək və onlara “ABAD” dəstək proqramına daxil olan xidmətlər göstərəcək.

İlkin olaraq Ağdam rayonunun Quzanlı qəsəbəsində müasir tələblərə cavab verən heyvan kəsimi məntəqəsinin qurulması ilə bağlı müvafiq təşkilati işlər həyata keçirilib, heyvan kəsimi məntəqəsinin tikiləcəyi ərazi müəyyənləşdirilib. Yeni heyvan kəsimi məntəqələrində Qida Təhlükəsizliyi İnstitutu tərəfindən laboratoriyalar qurulacaq, kəsimə və dövriyyəyə çıxarılacaq ət və ət məhsullarına baytarlıq-sanitariya nəzarəti təmin olunacaq.

Bütün bunlarla yanaşı, layihənin icrası yerli sahibkarlara peşəkar dəstəyin göstərilməsi və müasir tələblərə cavab verən xidmətlərin təşkilində yeni imkanlar yaradacaq. Yeni kəsim məntəqələrində fəaliyyət göstərəcək sahibkarların, eləcə də işə cəlb ediləcək texniki heyətin təlimləri agentliyin əvvəl icra etdiyi layihələrdən əldə olunan təcrübə əsasında aidiyyəti qurumlarla birgə həyata keçiriləcək.

Qeyd edək ki, layihənin icrası ilə bağlı işğaldan azad olunmuş ərazilərdə yaradılacaq müasir heyvan kəsimi məntəqələri və həmin məntəqələrdə fəaliyyət göstərəcək laboratoriyalara ixtisaslı mütəxəssislərin və texniki heyətin cəlb edilməsi ilə əlaqədar elanlar yaxın günlərdə ictimaiyyətə təqdim olunacaq.