Türkiyə Cümhuriyyəti Mərkəzi Bankı (TCMB) bu gün Bakı vaxtı ilə saat 15:00-da faiz qərarını açıqlayacaq.

Bu gün veriləcək faiz qərarı TCMB-nin yeni sədri Naci Ağbalın ilk faiz qərarı olacaqdır.

Marja xəbər verir ki, iqtisadçılar Mərkəzi Bankın bugünkü yığıncaqda faizi 4,75  bənd artıraraq əsas pul siyasəti faizini 15%-ə çatdıracağını gözləyirlər. İqtisadçıların proqnozunun reallaşması vəziyyətində, bu, 2018-ci ilin Sentyabr ayında edilən 6,25 bənd faiz artımından sonra  ən yüksək faiz artırımı olacaq.

Bazarlarda ən aşağı faiz artımı proqnozu 1,5 bənd, ən yüksək artım gözləntisi 5,5 faiz bəndidir.

Hazırda TCMB-nin əsas faizi 10.25%-dir. 

TCMB, Oktyabr yığıncağından sonra bir sıra sərt addımlar atıb.

Noyabr ayında isə bankın sədri dəyişib. Türkiyə Prezidentinin fərmanı ilə Murat Uysal vəzifədən azad edilərək Naci Ağbal təyin edilmişdir. Ağbal ilk yazılı açıqlamasında "Qiymət sabitliyinin təmin edilməsi üçün bütün siyasət vasitələrindən istifadə ediləcək" ifadələrini istifadə etmişdir.

Mərkəzi Bank proqnozlardan az faiz artırarsa Türk Lirəsi yenidən ucuzlaşa bilər. Lirənin bahalaşmasının davam etməsi üçün azı proqnoz qədər faizin artırılması tələb olunur. 

Ötən həftə Türk Lirəsi Türkiyədə yeni iqtisadi dövrün başlayacağına dair açıqlamalardan sonra bahalaşıb.

Türkiyə Preidenti Rəcəb Tayyib Ərdoğanın iqtisadiyyata dair verdiyi mesajlar Türk Lirəsini dəstəkləyib.

Türkiyə Preidenti Rəcəb Tayyib Ərdoğan, Partiyasının yığıncağında iqtisadiyyatda yeni dövrə işarə edərək, iqtisadi artım, sabitlik və məşğulluq üçüni bir səfərbərlik başladılacağını söyləyib. Ərdoğan, Mərkəzi Bankın yeni sədri Naci Ağbal ilə Xəzinə və Maliyyə Naziri Lütfü Elvanın atacaqları hər addımda onların yanında olacağını da vurğulayıb.

Ərdoğan, "Ölkəmizi riski az, etibarı yüksək, qazancı qənaətbəxş bir cazibə mərkəzi halına gətirməkdə qərarlıyıq. Makroiqtisadi sabitliyi təmin edəcəyik. Biznes və sərmayə mühitini daha cazibədar etmək istəyirik. İqtisadi rəhbərlik beynəlxalq sərmayəçilər ilə yaxın əlaqədə olacaq.  Struktur islahatları davam edəcək",- ifadələrini istifadə edib.

Həm Mərkəzi Bankın yeni sədri Naci Ağbalın, həm də yeni Maliyyə və xəzinə naziri Lütfi Elvanın mesajları, həm də Prezident Rəcəb Tayyib Ərdoğanın açıqlamaları, bazarlarda TCMB-in güclü faiz artırımı edəcəyinin siqnalı olaraq qiymətləndirilib və bu gözlənti ilə dollar/TL məzənnəsi 8,57-dən 7,60-a qədər geriləyib.