Veysəloğlu Şirkətlər Qrupu yeni İT strategiyası çərçivəsində istehsal və biznes proseslərinin SAP S/4HANA rəqəmsal platformasına keçirilməsi ilə bağlı növbəti mərhələni uğurla başa vurub.

Qrupdan Marja-ya daxil olmuş məlumatda bildirilir ki, Şirkətlər Qrupunda rəqəmsal platformaya keçidlə bağlı SAP Layihə Məşvərət Şurası yaradılıb. Şurada qəbul edilən qərara uyğun olaraq layihənin adı V-SAP olaraq təyin olunub və layihənin xüsusi loqosu hazırlanıb.

Ümumilikdə 8 mərhələdən ibarət SAP layihəsinin tətbiqi Veysəloğlu Şirkətlər Qrupu daxilində ilk olaraq “Veysəloğlu” MMC satış və distribüter şirkətindən tətbiq edilməyə başlanıb.

Qeyd edək ki, 11 hissədən ibarət “Proseslərin təhlili”nin 3-cü mərhələsi tamamlanıb və növbəti mərhələyə keçid üzərində fəaliyyətlər davam edir.

Veysəloğlu Şirkətlər Qrupunda SAP S/4HANA layihəsinin tətbiqinə 2020-ci ilin fevral ayından başlanılıb. Növbəti 5 il ərzində icrası nəzərdə tutulan transformasiya layihəsinin Şirkətlər Qrupunun bütün aktivlərinə şamil olunması nəzərdə tutulur.

Rəqəmsal layihə Şirkətlər Qrupunda logistika, daşınmaz əmlakın idarə edilməsi, satış və satınalma, istehsalat, insan resursları modulları daxil olmaqla bütün departamentləri əhatə edir.

Xatırladaq ki, SAP S/4HANA Müəssisə Resurslarının Planlaşdırılması (Enterprise Resource Planning - ERP) üzrə dünyada lider sistem olaraq ən uğurlu pərakəndəçilərin seçimidir.

Biznes üçün rəqəmsal nüvə olan SAP S/4HANA, şirkətin xarici çağırışlara cəld reaksiya verməyə kömək edir. Platforma real vaxtda böyük həcmdə məlumatlarla işləməyə və biznes modellərini asanlıqla yenidən təşkil etməyə imkan verir. SAP S/4HANA, iş proseslərinin uyğunlaşdırılması, həmçinin maşın öyrənməsinə və süni intellektə əsaslanan yenilikçi həll yollarının həyata keçirilməsi üçün çevik imkanlar təqdim edir.

26 ildir fəaliyyət göstərən və ölkənin iri şirkətlərindən olan Veysəloğlu Şirkətlər Qrupunda 15 mindən çox əməkdaş çalışır.