Tunisin turizm sektoru böhranla üzləşib

Tunisin turizm sektoru böhranla üzləşib

Tunis Otelçilər Federasiyasının məlumatına görə, ölkədə fəaliyyət göstərən 800 oteldən yalnız 300-ü açıqdır. Bu barədə “Business İnsider” saytı məlumat yayıb.

Bildirilir ki, yanvar–avqust ayları ərzində ölkənin turizm sektorunun əldə etdiyi gəlir ötən ilin müvafiq dövrü ilə müqayisədə 59 faiz azalıb. Mütəxəssislərin proqnozuna görə, itkilər ilin sonunadək 2 milyard avro təşkil edəcək. Bu hələ pandemiyadan əvvəl qeyri-sabit vəziyyətdə olan ölkə iqtisadiyyatı üçün mənfi tendensiya hesab edilir.

Məlumata görə, Tunis hökuməti itkiləri maksimum azaltmaq niyyətindədir. Çünki itkilərin qarşısı alınmazsa, yaxın gələcəkdə hər hansı gəlirdən danışmaq mümkün olmayacaq. Qeyd olunur ki, ölkədə koronavirusa 3 min 323 yoluxma halı və bu xəstəlikdən 73 ölüm faktı qeydə alınıb. Virusa yoluxma göstəricisi istənilən Avropa ölkəsi ilə müqayisədə daha aşağıdır, buna görə də Tunis Avropa İttifaqı üçün təhlükəsiz ölkələrin seçilmiş siyahısına daxildir. Lakin son həftələr təyyarələr yalnız yarıya qədər sərnişinlərlə dolu gəlirdi. Əlcəzair hər il bir milyondan çox turistin gəlməsi sayəsində Tunis üçün əsas gəlir mənbəyidir.

VTB-də minimal faiz dərəcəsi ilə nağd kredit 10.49%-dən

Yeri gəlmişkən, ölkədə ÜDM-in 8 faizindən çoxunu təşkil edən və 400 min insanın işlədiyi turizm sektorunda böhran ilin ikinci rübündə ÜDM-in 21,6 faiz azalmasına əhəmiyyətli dərəcədə təsir etdi. Məlumat üçün deyək ki, otelçilikdən savayı, sənaye və tikinti sektoruna mart ayında hökumət tərəfindən tətbiq olunmuş sərt məhdudiyyətlər səbəbindən ciddi ziyan dəyib. Bu qaranlıq mənzərə 161 min iş yerinin itirilməsinə səbəb olub. İşsizliyin səviyyəsi isə 18 faizə çatıb. Tunisin Maliyyə naziri Nizar Yaiş dövlət maliyyəsi üçün tələb olunan yardımın məbləğini, təxminən, 3 milyard avro həcmində hesablayıb.

07.09.2020 08:16