Avro daha da bahalaşa bilər

Avro daha da bahalaşa bilər

Beynəlxalq valyuta birjalarında Amerika ilə Çin arasında gərgin münasibətlərin yeni səviyyəyə yüksəlməsi, dolların ucuzlaşmasına səbəb olub. Beləliklə, EUR/USD və GBP/USD məzənnələrində də bahalaşma müşahidə edilir.

Təhlillərə əsasən, EUR 1.19$-ın qırılması ilə 1.20$-a kimi bahalaşmaqda davam edə bilər. GBP-nin dollara nisbətən qiyməti də 1.31$-ın üzərində ticarət edilir və 1.32$-a kimi bahalaşacağı proqnozlaşdırılır.

Foreks bazarlarında dolların ucuzlaşması USD/JPY məzənnəsində daha aydın görünür. Belə ki, məzənnə son üç ticarət günündə 105 yenə kimi 1.4%-a kimi dəyər itirib. Lakin dollar ilə müqayisədə lirə daha çox təzyiq altındadır. USD/TRY məzənnəsi Avropa sessiyasında 7.40TL-yə kimi bahalaşdıqdan sonra korreksiya etsə də Asiya sessiyasında müqaviməti qırmaq üzrədir. Bunun baş verməsi şəraitində Dollar/Lirə valyuta cütlüyünün qiyməti 7.56TL-yə kimi bahalaşa bilər.

Qlobal siyasi və iqtisadi risklərin daha da artması, əlvan metallar bazarlarında qızıla olan tələbi yenidən artırıb. Keçən həftə 1863$-a kimi korreksiya edən bir unsiya üzrə qiymət bu səviyyədən dəstək alaraq, bahalaşmağa başlamışdır. Cari həftə ərzində isə qiymət artıq yenidən 1995$-ın üzərində dalğalanmaqdadır və sözügedən səviyyənin üzərində qalarsa, 2032 və 2075$-a kimi də dəyər qazana bilər.

Bu gün birjalarda məzənnələrə güclü təsir edə biləcək fundamental göstəricilər azdır. İnvestorlar bu gün Bakı vaxtı ilə saat 16:30-da Amerikanın tikinti sektoruna dair dərc ediləcək göstəricilərlə kifayətlənməli olacaqlar. Lakin cümə günü Avrozona və İngiltərənin xidmət və sənaye sektorları ilə bağlı açıqlanacaq göstəricilər diqqət mərkəzində qalmaqdadır.

Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.

18.08.2020 11:27

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az