Çinin dövlət şirkəti olan "China CAMC Engineering” strateji tərəfdaşı “AS Group”un “Fresh Logistics Park” layihəsini maliyyələşdirəcək, inşa edəcək və parkı Çinin “Foton” yük avtomobilləri, “Kassbohrer” soyuducu treylerləri ilə təmin edəcək.

Bununla bağlı tərəflər arasında təxminən bir il davam edən danışıqların nəticəsində müavilə imzalanıb.

Müqavilə Azərbaycan Prezidenti İlham Əliyevin ötən ilin aprelində 2-ci "Bir kəmər, bir yol" beynəlxalq əməkdaşlıq forumunda iştirak etmək üçün Pekinə səfəri zamanı imzalanmış sənədlərdən olan "China CAMC Engineering" və “AS Group”un nəqliyyat sahəsi üzrə strateji əməkdaşlıq haqqında memorandumunun icrası çərçivəsində reallaşıb. Həmin memorandum iki şirkət arasında gələcək əməkdaşlığın inkişaf perspektivlərini tənzimləyirdi.

İmzalanan müqavilə və layihə barədə daha ətraflı məlumat verən “China CAMC Engineering”in Bakı ofisinin rəhbəri Kənan Quluzadə deyib ki, Azərbaycan ilə Çin arasında yüksək səviyyədə olan münasibətlər müxtəlif şirkətlər arasında əməkdaşlıq üçün yeni imkanlar yaradır:

"Şirkətimizin regiondakı strateji tərəfdaşı olan “AS Group” şirkəti ilə bir neçə layihə üzərində işləyirik. “AS Group”un “Fresh Logistics” park layihəsinin birinci fazasının baş podrat müqaviləsini imzaladıq. Layihə Hövsan ərazisində geniş formatlı logistika parkının tikintisini, yük avtomobillərinin və soyuducu treylerlərin təchizatını nəzərdə tutur. Layihənin birinci fazasının dəyəri 18,89 milyon ABŞ dollarıdır. İnşaat müddətində təqribən 2 min, fəaliyyətə başladıqdan sonra minə yaxın yeni iş yeri açılması nəzərdə tutulub. Bu layihə ilə yanaşı strateji tərəfdaşımız “AS Group” ilə “Azərbaycan–Çin aqro-sənaye parkı” layihəmiz də aktualdır. Müvafiq layihənin danışıqlarını Azərbaycan tərəfi ilə davam etdiririk. Bu layihələr Azərbaycan ilə Çin arasında iqtisadi əlaqələrin genişlənməsində ayrı-ayrı şirkətlərin fəal iştirakının bariz nümunəsidir".

©️ Azərtac