Aprelin 11-də Bakının Nobel prospektində "SOCAR PETROLEUM" Qapalı Səhmdar Cəmiyyətinə (QSC) məxsus ən yüksək standartlara cavab verən, SOCAR brendli yanacaqdoldurma məntəqəsi (YDM) istifadəyə verilib.

SOCAR-ın mətbuat xidmətindən bildirilib ki, bununla da respublikamızda SOCAR brendi ilə fəaliyyət göstərən YDM-lərin sayı 25-ə çatıb. Bununla bağlı keçirilən tədbirdə SOCAR-ın prezidenti Rövnəq Abdullayev və şirkət rəhbərliyinin nümayəndələri iştirak ediblər. R.Abdullayev Azərbaycan ərazisində SOCAR brendi ilə fəaliyyət göstərən yanacaqdoldurma məntəqələri şəbəkəsinin aktiv şəkildə genişləndiyi qeyd edib, bunun ölkə əhalisinin sosial rifahının durmadan yaxşılaşdırılmasına xidmət etdiyini vurğulayıb. SOCAR-ın prezidenti və tədbir iştirakçıları yanacaqdoldurma məntəqəsində yaradılan şərait, YDM-in strukturu, burada tətbiq olunmuş elm və texnologiyanın ən son nailiyyətlərini özündə əks etdirən müasir avadanlıqlarla tanış olublar.

Bildirilib ki, yeni açılan məntəqədə nağdsız satış üçün POS-terminallar, “ASAN” ödəniş terminalı, son model Yaponiya istehsalı olan yanacaqpaylayıcı kolonkalar quraşdırılıb, yanacağın satışına və çənlərin vəziyyətinə nəzarət etmək üçün avtomatik sistem kimi innovativ yeniliklər tətbiq edilib. “Super”, “Premium”, A-92 (benzin) və dizel tipli yanacaq məhsullarının satışı həyata keçiriləcək məntəqədə 5 yanacaqpaylayıcı kolonka quraşdırılıb, bununla da 8 kiçik avtonəqliyyat vasitəsi və 2 iritutumlu yük maşınının eyni vaxtda yanacaqla təmin edilməsi üçün şərait yaradılıb. Məntəqədə 40 nəfər işçi çalışır.

R.Abdullayev “SOCAR PETROLEUM” QSC-nin kollektivini yeni YDM-in istifadəyə verilməsi münasibətilə təbrik edib, əməkdaşlara uğurlar arzulayıb, əmin olduğunu bildirib ki, QSC-nin əməkdaşları qarşıya qoyulan vəzifələri daha yüksək səviyyədə həyata keçirəcək, göstərilən etimadı doğruldacaqlar.