Prezident İlham Əliyev Azərbaycan Dövlət Dəniz Akademiyasının rektoru Heydər Əsədovun təltif olunması haqqında sərəncam imzalayıb. 

Sərəncama əsasən, Azərbaycan Respublikasında təhsilin inkişafında xidmətlərinə görə Heydər Xanış oğlu Əsədov “Şöhrət” ordeni ilə təltif edilib. 

Qeyd edək ki, H.Əsədov 1959-cu il oktyabrın 24-də anadan olub. 1978-ci ildə Bakı Sovet Ticarəti Texnikumunun mühasibat uçotu fakültəsini, 1983-cü ildə isə D.Bünyadzadə adına Azərbaycan Xalq Təsərrüfatı İnstitutunun Uçot-iqtisad fakültəsini bitirib.

1978-1984-cü illərdə İnstitutda oxuduğu illərdə fəhlə, mühasib, böyük mühasib, böyük təftişçi vəzifələrində çalışıb. 1983-1992-ci illərdə Azərbaycan Dövlət İqtisad İnstitutunda müəllim, baş müəllim vəzifələrində işləyib, 1987-ci ildə M.V.Lomonosov adına Moskva Dövlət Universitetində namizədlik dissertasiyasını müdafiə edərək iqtisad elmləri namizədi alimlik dərəcəsini alıb.

1992-1995-ci illərdə Türkiyənin Mərmərə Universitetinin doktorantı olub.

1995-ci ildə Azərbaycan Respublikası Prezidentinin sərəncamı ilə maliyyə nazirinin müavini təyin edilib, 1996-2007-ci illərdə Maliyyə Nazirliyi yanında Baş Dövlət Xəzinədarlığının Baş direktoru, Azərbaycan Respublikası maliyyə nazirinin müavini, 2007-2013-cü illərdə isə Azərbaycan Respublikası Hesablama Palatasının sədri vəzifələrində çalışıb.

2013-ci ilin oktyabrın 22-dən 2018-ci ilin aprelin 21-dək Azərbaycan Respublikasının kənd təsərrüfatı naziri vəzifəsində işləyib.

2011-ci ildə 2-ci dərəcəli "Vətənə xidmətə görə" ordeni ilə təltif olunub. 3 monoqrafiyanın və 30-dan çox elmi əsərin müəllifidir.

2019-cu ilin aprelin 3-də Azərbaycan Dövlət Dəniz Akademiyasının rektoru təyin edilib. 

Ailəlidir. Üç övladı var.

“Prezident görmüş olduğumuz işləri dəyərləndirir”

 Heydər Əsədov “Şöhrət” ordeni alması ilə bağlı təəssüratlarını bölüşüb.

Çox sevincli olduğunu bildirən rektor bu hissləri yaşatdığına görə ölkə rəhbərliyinə dərin təşəkkürünü bildirib:

“Çox qürurluyam. Çox sevinirəm ki, harada, hansı vəzifədə olmağımızdan asılı olmayaraq, cənab Prezident azacıq da olsa, görmüş olduğumuz işləri dəyərləndirir. Bu ölkənin inkişafında xidmətləri olan insanları unutmur. Buna görə də özümün, ailəmin, dostlarımın, bu sevinci mənimlə bölüşənlərin adından cənab Prezidentə minnətdarlığımı, ali hörmətimi çatdırıram”.

 
Hər zaman dövlətçilik ənənələrinə sadiq qaldığını ifadə edən H.Əsədov bundan sonra ölkə rəhbərinin siyasi kursunu dəstəkləyəcəyini vurğulayıb.