Türkiyə qaz alışını Rusiyadan azaldıb, Azərbaycandan artırıb

Türkiyə qaz alışını Rusiyadan azaldıb, Azərbaycandan artırıb

Türkiyə qaz alışını Rusiyadan azaldıb, Azərbaycandan artırıb

Türkiyənin boru kəmərləri ilə təbii qaz idxalı 2019-cu ilin yanvar-iyun dövründə ötən ilin eyni dövrü ilə müqayisədə 18 faiz azalaraq 16 milyard 152 milyon kubmetrə düşüb. "Marja" Türkiyə mətbuatına istinadən xəbər verir ki, bu azalmada ən mühüm amil Rusiya qazı idxalının azalması olub.

Həmin dövrdə Rusiyadan kəmərlər ilə alınan təbii qaz 36 faiz azalaraq 7 milyard 991 milyon kubmetrə düşüb. Beləliklə, keçən il yanvar-iyun dövründə 48 faiz olan Rusiya qazının ümumi qaz idxalındakı payı bu il 34%-ə geriləyib.

Bu dövrdə yeni Trans-Anadolu Təbii Qaz Boru Kəmərinin də təsirilə, Azərbaycandan alınan təbii qaz miqdarı 38 faiz artımla 4 milyard 410 milyon kubmetrə yüksəlib. İrandan alınan qazda isə 5%-lik azalma baş verib.

Türkiyənin Mayeləşdirilmiş Təbii Qaz (LNG) idxalı isə ilin ilk yarısında ötən ilin eyni dövrü ilə müqayisədə 14 faiz artaraq 7 milyard 136 milyon kubmetrə yüksəlib.

Enerji Bazarına Nəzarət Palatasının göstəricilərindən topladığı məlumatlara görə, təbii qazda mənbə müxtəlifliyini artırmaq məqsədilə LNG müəssisələrinə qoyulan investisiyalar meyvələrini verməyə başlayıb.

Türkiyənin ümumi qaz idxalı ilin ilk yarısında ötən ilin eyni dövrü ilə müqayisədə 10 faiz azalaraq 23 milyard 287 milyon kubmetrə enib. Bu azalmaya baxmayaraq LNG idxalı, dünyada azalan qiymətlərin də təsiri ilə 14 faiz artaraq 7 milyard 136 milyon kubmetrə çatıb. Əlcəzairdən alınan LNG miqdarı ilin ilk yarısında ötən ilin eyni dövrü ilə müqayisədə 37 faiz artımla 2 milyard 942 milyon kubmetrə yüksəlib, Qətərdən alınan LNG miqdarı isə 34 faiz azalaraq 1 milyard 274 milyon kubmetrə düşüb. Bu dövrdə, ABŞ-dan idxal edilən LNG miqdarı 363 faiz artaraq 884 milyon kubmetrə çatıb. ABŞ Enerji Nazirliyinin avqust ayına dair LNG hesabatına görə, Türkiyə 2016-cı ilin fevral ayından bu yana Avropada İspaniyadan sonra ən çox ABŞ LNG-si idxal edən ikinci ölkədir.

09.09.2019 05:18

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az