Çinin texnologiya nəhəngi "Huawei" verdiyi açıqlamada, bu il ABŞ bazarı olmadan və şirkətin üzərindəki qlobal təzyiq şəraitində də dünyanın ən çox ağıllı telefon satan istehsalçısı ola biləcəyini qeyd edib.
 

"Marja" xəbər verir ki, telefonlardan tutmuş müxtəlif telekommunikasiya avadanlıqlarının istehsalçısı olan "Huawei"nin, ötən il istehlakçı bazarı məhsullarından gəlirləri 50% artım qeyd edərək 52 milyard dolları keçib. Şirkət gələn ay yeni beşinci nəsil (5G) texnologiyasını dəstəkləyən ağıllı telefonu təqdim edəcək. Bu telefon ilə satışların daha da artacağı bildirilib.  
 

Tarixində ilk dəfə "Huawei"nin istehlakçı bazarına yönəlmiş məhsullarının satışından gəlirlər telekommunikasiya avadanlıqlarının satışından gəlirləri keçəcəkdir.
 

"Huawei"nin istehlakçı malları departamentinin rəhbəri Riçard Yu, şirkətin keçən il 208 milyon ədəd ağıllı telefon sifarişi aldığını qeyd edərək "ABŞ bazarı olmasa da, dünyada bir nömrə olacağıq. Bunun bu il, olmasa da, ən gec gələn il reallaşacağına inanıram" deyib. 
 

Məsləhət firması IDC-nin proqnozlarına görə, dünya miqyasında ağıllı telefon satışları keçən il 3% azalıb, bu il də aşağı təkrəqəmli faizlərdə artım olacaq və bu vəziyyət 2022-ci ilə qədər davam edə bilər. Digər tərəfdən isə IDC-nin proqnozuna görə, 5G mobil şəbəkə texnologiyasının təqdim edilməsi sektorunun böyüməsinə töhfə verə bilər.
 

"Huawei", özünün mikroçip texnologiyasını telefon və serverlərində istifadə edir, ancaq şirkət "Qualcomm" və "Intel" kimi çip istehsalçılarına bu sektorda rəqib olmaq niyyətində olmadığını da bildirir.
 

"Huawei" həmçinin "Tiangang" adlı bir 5G baza stansiyası çip mərkəzini təqdim edib. Şirkətin Rabitə Xidmətləri Departamentinin rəhbəri Ryan Ding, "Huawei"nin Avropada 18, Orta Şərqdə 9, Asiya-Sakit Okean regionunda 3 olmaq üzrə cəmi 30, 5G müqaviləsi imzaladığını da söyləyib.