1956-cı ildə Neftçalanın Yenikənd kəndində tikilib istfadəyə verilən Kür Təcrübə Nərəbalıqartırma Zavodu keçən əsrin 70-80-ci illərində respublikadakı balıqçılıq sənayesi sahəsinin qabaqcıl, yenilikçi müəssisələrindən biri olmuşdu. Lakin zaman bu müəssisənin taleyi üçün də öz sözünü demişdi.

İllər keçdikcə buradakı qurğu və avadanlıqlar köhnəlib sıradan çıxmışdı. SSRİ-nin dağılması, 1990-cı illərdə respublikamızda baş verən məlum hadisələr bu prosesi daha da sürətləndirmişdi. Elə buna görə də müəssisənin əsaslı şəkildə yenidən qurulması tələb olunurdu.

Azərbaycan Respublikası dövlət əmlakının özəlləşdirilməsinin II Dövlət Proqramına və investisiya müsabiqəsinin keçirilməsi qaydalarına uyğun olaraq, 31 may 2018-ci il tarixdə sözügedən müəssisənin satış üzrə investisiya müsabiqəsi elan olunmuş və 4 iyul 2018-ci il tarixdə açıq səsvermə yolu ilə "Azərbaycan Fish Farm” MMC müsabiqənin qalibi elan edilmişdir. Alqı-satqı müsabiqəsinin şərtlərinə uyğun olaraq qalib şirkətə ilkin mərhələdə 750 min manat vəsait ayrılmışdır. Bütövlükdə isə layihənin dəyəri 3 milyon 79 min manatdır.

İnvestisiya proqramına müvafiq olaraq, yeni zavodda CITES Konvensiyası (kökünün kəsilməsi təhlükəsi olan vəhşi fauna və yabanı flora növlərinin beynəlxalq ticarət konvensiyası) çərçivəsində nəsli kəsilməkdə olan 4 növ edemik balığın (bölgə, kələmo, nərə, uzunburun) yetişdirilməsi planlaşdırılır. İnvestisiya proqramının icrası nəticəsində müəssisənin Xəzəryanı ölkələr arasında ilk nohur açıq su təchizatı sistemi və qapalı su çevrəsi əsasında fəaliyyət göstərəcək ixtisaslaşdırılmış damazlıq təsərrüfatı olacağı gözlənilir.

Tikintiyə cari ilin sentyabrında start verilmişdir. İşin birinci mərhələsini "İnşaatçı Neftçi” görür. Tikintiyə 25-dən çox maşın-mexanizm - buldozer, qreyder, torpaqkipləşdirici texnika, ağırtonnajlı maşın cəlb edilmişdir. Usta və fəhlələrin sayı 40 nəfərdir. Onların gərgin əməyi sayəsində obyektdə indiyədək xeyli iş görülmüşdür. Hər birinin sahəsi 1 hektar olan 21 nohurun inşasında işlərin çoxu başa çatdırılmış və hazırda onları su ilə qidalandıracaq, habelə nohurlardan çıxan suyu Kür çayına axıdacaq beton kanallar, şlüzlər, qatlavanlar tikilir.

Birinci mərhələdə qapalı su servisi və inkubasiya sexində ana balıqlardan götürülən kürü təmizlənərək sürfələr alınacaq. Sürfələrin çəkisi 2-3 qrama çatanda dairəvi hovuzlara köçürüləcək və 500 qramadək böyüdükdən sonra böyük hovuzlara buraxılacaq. Balıqlar üçün yaş dövrünə uyğun olaraq yemlər yetişdiriləcək. Tikintinin ikinci mərhələsində də xarici ölkələrdən alınan avadanlıqlar quraşdırılacaq.

Yeni müəssisənin 50 hektar ərazisi var. Burada təzə inzibati bina və digər lazımi tikililər inşa ediləcək, yaşıllıqlar salınacaq. Obyektin gələn ilin payızında istifadəyə verilməsi nəzərdə tutulub.

 
© "Azərbaycan”