“VTB Azərbaycan” ASC 2026-cı ilin ilk 9 ayını 7 milyon 678 min manat xalis mənfəətlə başa vurub. 2025-ci ilin sonu ilə müqayisədə bankın aktivləri 20,1%, kredit portfeli 24,8%, depozit portfeli isə 50,7% artıb. Xüsusilə istehlak kreditləri və fiziki şəxslərin depozitləri üzrə yüksək artım qeydə alınıb.

Marja.az xəbər verir ki, bu, “VTB Azərbaycan” ASC-nin 30 sentyabr 2026-cı il tarixinə açıqladığı maliyyə hesabatlarından məlum olur.

2026-cı ilin yanvar-sentyabr aylarında VTB Azərbaycanın xalis mənfəəti 7 milyon 678 min manat təşkil edib. 2025-ci ilin müvafiq dövründə bankın xalis mənfəəti 10 milyon 490 min manat olmuşdu. Beləliklə, bankın xalis mənfəəti illik müqayisədə 2 milyon 812 min manat və ya 26,8% azalıb.

Bankın mənfəət vergisindən əvvəlki mənfəəti də 10 milyon 490 min manatdan 7 milyon 530 min manata geriləyib. Azalma 2 milyon 960 min manat və ya 28,2% təşkil edib.

Hesabatda mənfəət vergisi üzrə 148 min manatlıq müsbət göstərici əks olunub. Bu səbəbdən bankın dövr üzrə xalis mənfəəti vergidən əvvəlki mənfəətini üstələyib.

Faiz gəlirləri cüzi artıb, faiz xərcləri isə 26% yüksəlib

VTB Azərbaycanın 2026-cı ilin ilk 9 ayında faiz gəlirləri 31 milyon 280 min manat təşkil edib. Ötən ilin eyni dövründə bu göstərici 31 milyon 81 min manat idi. Beləliklə, faiz gəlirləri cəmi 199 min manat və ya 0,6% artıb.

Müştərilərə verilmiş kreditlər üzrə faiz gəlirləri 23 milyon 579 min manatdan 28 milyon 286 min manata yüksəlib. Bu istiqamətdə artım təxminən 20% olub. Bunun əksinə, banklar və digər maliyyə institutlarına verilmiş kreditlər üzrə faiz gəlirləri 5 milyon 223 min manatdan 999 min manata enib.

Hesabat dövründə bankın faiz xərcləri isə 7 milyon 416 min manatdan 9 milyon 358 min manata yüksəlib. Beləliklə, faiz xərcləri 1 milyon 942 min manat və ya 26,2% artıb.

Faiz xərczərinin əsas hissəsi depozitlər üzrə ödənilən faizlərdən formalaşıb. Depozitlər üzrə faiz xərcləri 5 milyon 761 min manatdan 7 milyon 290 min manata çatıb. Nəticədə, bankın xalis faiz gəlirləri 22 milyon 939 min manatdan 21 milyon 923 min manata geriləyib. Bu, 1 milyon 16 min manat və ya 4,4% azalma deməkdir.

Göstəricilərdən məlum olur ki, faiz xərclərinin gəlirlərdən daha sürətlə artması bankın xalis faiz gəlirlərini azaldıb.

Qeyri-faiz gəlirləri 10,7% azalıb

2026-cı ilin yanvar-sentyabr aylarında VTB Azərbaycanın qeyri-faiz gəlirləri 10 milyon 175 min manat olub. Ötən ilin müvafiq dövründə bu göstərici 11 milyon 388 min manat təşkil etmişdi. Beləliklə, qeyri-faiz gəlirləri 1 milyon 213 min manat və ya 10,7% azalıb. Bankın haqq və komissiya gəlirləri 3 milyon 28 min manatdan 3 milyon 281 min manata yüksəlsə də, xarici valyuta əməliyyatlarından əldə olunan gəlirlər azalıb. Belə ki, xarici valyutadan gəlirlər 7 milyon 347 min manatdan 6 milyon 650 min manata enib.

Bankın digər gəlirləri isə 1 milyon 14 min manatdan 244 min manata düşüb.

Beləliklə, qeyri-faiz gəlirlərinin azalmasında xarici valyuta əməliyyatları və digər gəlirlər üzrə geriləmə mühüm rol oynayıb.

Əməliyyat xərcləri azalıb

VTB Azərbaycanın qeyri-faiz xərcləri 2026-cı ilin ilk 9 ayında 24 milyon 893 min manat təşkil edib.

Bu göstərici ötən ilin eyni dövründə 25 milyon 152 min manat olmuşdu. Beləliklə, bankın qeyri-faiz xərcləri 258 min manat və ya 1% azalıb.

Əməkhaqqı və digər kompensasiya xərcləri 16 milyon 223 min manatdan 16 milyon 57 min manata enib. Ümumi və inzibati xərclər isə 5 milyon 454 min manatdan 5 milyon 448 min manata düşüb. Amortizasiya xərcləri 2 milyon 314 min manat, digər qeyri-faiz xərcləri isə 1 milyon 74 min manat təşkil edib.

Bankın xərclərində cüzi azalma qeydə alınsa da, xalis faiz və qeyri-faiz gəlirlərinin geriləməsi xalis mənfəətin azalmasına səbəb olan əsas amillərdən olub.

Aktivlər 367,8 milyon manata çatıb

VTB Azərbaycanın cəmi aktivləri 30 sentyabr 2026-cı il tarixinə 367 milyon 790 min manat təşkil edib. 2025-ci ilin sonunda bankın aktivləri 306 milyon 222 min manat idi. Beləliklə, cari ilin ilk 9 ayında aktivlər 61 milyon 568 min manat və ya 20,1% artıb.

Aktivlərin artımında əsas rol müştərilərə verilmiş kreditlərin genişlənməsinə məxsus olub. Bankın nağd pul vəsaitləri və ekvivalentləri 17 milyon 534 min manatdan 25 milyon 414 min manata yüksəlib.

Digər tərəfdən, banklar və digər maliyyə institutlarında yerləşdirilmiş depozitlərin həcmi 33 milyon manatdan 20 milyon manata azalıb.

Ticarət və investisiya qiymətli kağızlarının həcmi isə 9 milyon 920 min manatdan 7 milyon 960 min manata düşüb.

Kredit portfeli 60,4 milyon manat artıb

VTB Azərbaycanın müştərilərə verdiyi kreditlərin ümumi həcmi 2026-cı il sentyabrın 30-na 304 milyon 43 min manat təşkil edib. 2025-ci ilin sonunda bu göstərici 243 milyon 638 min manat idi. Beləliklə, bankın kredit portfeli 9 ayda 60 milyon 406 min manat və ya 24,8% genişlənib.

Kredit portfelində ən yüksək artım istehlak kreditləri üzrə qeydə alınıb. İstehlak kreditlərinin həcmi 111 milyon 271 min manatdan 163 milyon 918 min manata yüksəlib. Bu, 52 milyon 648 min manat və ya 47,3% artım deməkdir.

Biznes kreditləri 67 milyon 536 min manatdan 68 milyon 707 min manata çatıb. Artım 1 milyon 171 min manat və ya 1,7% təşkil edib.

Daşınmaz əmlak kreditləri isə 64 milyon 831 min manatdan 71 milyon 418 min manata yüksəlib. Beləliklə, daşınmaz əmlak kreditləri 10,2% artıb.

Hesablamalara əsasən, VTB Azərbaycanın ümumi kredit portfelinin təxminən 53,9%-i istehlak kreditlərinin, 23,5%-i daşınmaz əmlak kreditlərinin, 22,6%-i isə biznes kreditlərinin payına düşüb.

İstehlak kreditləri 9 ay ərzində ümumi kredit portfelindəki artımın təxminən 87,2%-ni təmin edib. Bu isə bankın kredit portfelinin genişlənməsində əsas hərəkətverici qüvvənin istehlak kreditləri olduğunu göstərir.

Kreditlər üzrə ehtiyatlar da artıb

Bankın müştərilərə verilmiş kreditlər üzrə mümkün zərərlər üçün yaratdığı məqsədli ehtiyatların həcmi 2025-ci ilin sonundakı 31 milyon 987 min manatdan 2026-cı ilin sentyabr ayının sonuna 33 milyon 110 min manata yüksəlib. Beləliklə, kreditlər üzrə balans ehtiyatları 1 milyon 123 min manat və ya 3,5% artıb.

Ehtiyatlar çıxıldıqdan sonra bankın xalis kredit portfeli 211 milyon 651 min manatdan 270 milyon 933 min manata çatıb.Xalis kredit portfelinin artımı 28% təşkil edib.

Kreditlər üzrə ehtiyatların ümumi kredit portfelinə nisbəti isə 2025-ci ilin sonundakı 13,1%-dən 2026-cı ilin sentyabrında 10,9%-ə enib.

Bu göstərici ehtiyatların kredit portfelindən daha aşağı templə artdığını göstərir. Bununla belə, kredit portfelinin keyfiyyətini tam qiymətləndirmək üçün gecikmiş və qeyri-işlək kreditlər haqqında əlavə məlumatlar tələb olunur.

Depozit portfeli 51% artıb – Əhalinin vəsaitlərində kəskin artım

VTB Azərbaycanın depozit portfeli 2026-cı il sentyabrın 30-na 153 milyon 423 min manat təşkil edib. 2025-ci ilin sonunda bankın depozitləri 101 milyon 814 min manat olmuşdu. Beləliklə, depozit portfeli 9 ayda 51 milyon 609 min manat və ya 50,7% artıb.

Ən yüksək artım fiziki şəxslərin depozitləri üzrə qeydə alınıb. Belə ki, əhalinin bankdakı depozitləri 75 milyon 262 min manatdan 126 milyon 590 min manata yüksəlib. Bu, 51 milyon 327 min manat və ya 68,2% artım deməkdir.

Hüquqi şəxslərin depozitləri isə 26 milyon 552 min manatdan 26 milyon 833 min manata çatıb. Bu istiqamətdə artım cəmi 281 min manat və ya 1,1% təşkil edib.

Hesablamalara əsasən, bankın depozit portfelindəki 51,6 milyon manatlıq artımın təxminən 99,5%-i fiziki şəxslərin vəsaitlərinin artması hesabına formalaşıb.

Nəticədə, fiziki şəxslərin ümumi depozit portfelində payı 2025-ci ilin sonundakı 73,9%-dən 2026-cı ilin sentyabrında 82,5%-ə yüksəlib.

Bu, bankın depozit bazasında əhalidən cəlb edilmiş vəsaitlərin rolunun əhəmiyyətli dərəcədə gücləndiyini göstərir.

Öhdəliklər 27,5% artıb

VTB Azərbaycanın cəmi öhdəlikləri 2026-cı il sentyabrın 30-na 249 milyon 454 min manat təşkil edib. 2025-ci ilin sonunda bu göstərici 196 milyon 290 min manat olmuşdu. Beləliklə, öhdəliklər 53 milyon 163 min manat və ya 27,1% artıb.

Bankın Mərkəzi Bank və dövlət fondları qarşısında öhdəlikləri 69 milyon 901 min manatdan 76 milyon 515 min manata yüksəlib.

Kredit təşkilatları və digər maliyyə institutları qarşısında öhdəliklər isə 10 milyon 233 min manatdan 4 milyon 26 min manata azalıb.

Öhdəliklərin strukturunda depozitlərin xüsusi çəkisi artıb.

Balans kapitalı 118,3 milyon manata yüksəlib

VTB Azərbaycanın balans kapitalı 2026-cı il sentyabrın 30-na 118 milyon 336 min manat təşkil edib. 2025-ci ilin sonunda bankın kapitalı 109 milyon 931 min manat idi. Beləliklə, kapital 8 milyon 404 min manat və ya 7,6% artıb.

Bankın səhmdar kapitalı 315 milyon 815 min manat səviyyəsində dəyişməz qalıb.

Bölüşdürülməmiş zərərin həcmi isə 207 milyon 576 min manatdan 199 milyon 898 min manata enib. Bu, yığılmış zərərin 7 milyon 678 min manat azalması deməkdir.

Bankın ümumi ehtiyatları isə 1 milyon 692 min manatdan 2 milyon 418 min manata yüksəlib.

Kapital adekvatlığı normativ tələblərdən əhəmiyyətli dərəcədə yüksəkdir

VTB Azərbaycanın kapital strukturu haqqında hesabatına əsasən, 30 sentyabr 2026-cı il tarixinə bankın məcmu kapitalı 106 milyon 802 min manat təşkil edib.

Bankın risk dərəcəsi üzrə ölçülmüş yekun aktivləri isə 338 milyon 839 min manat olub. I dərəcəli kapital adekvatlığı əmsalı 28,54%, məcmu kapital adekvatlığı əmsalı isə 31,52% təşkil edib. Bankın leverec əmsalı 25,96% səviyyəsində olub. Beləliklə, bankın kapital adekvatlığı göstəriciləri prudensial minimum tələbləri əhəmiyyətli dərəcədə üstələyir.

Məcmu kapital adekvatlığı əmsalı sistem əhəmiyyətli banklar istisna olmaqla digər banklar üçün müəyyən edilmiş 10,5%-lik minimum normadan 21,02 faiz bəndi yüksəkdir. Bu, bankın risklə ölçülmüş aktivlərinə nisbətən yüksək kapital təminatına malik olduğunu göstərir.

Ümumilikdə, VTB Azərbaycan 2026-cı ilin ilk 9 ayında kredit və depozit portfellərini sürətlə genişləndirsə də, faiz xərclərinin artması bankın mənfəətliliyini məhdudlaşdırıb.