"ATENA" şirkətinin yeni sahibi məhsulların satışı fəaliyyətini "Avrora" distribyutor şirkətinə ötürməyə qərar verib və işçilərin ixtisarı gözlənilir. "ATENA"nın satış ilə məşğul olan işçiləri bildirirlər ki, "Avrora" şirkətinin öz komandası olduğundan onlara bu şirkətdə yer yoxdur. "Bizə anidən xəbər verdilər. Bu qədər insanı işsiz qoymaqla, onların ailələrini çətin vəziyyətdə qoymq doğru deyil. Biz dövlət qrumlarından kömək istəyirik", - işçilər bildirirlər. Ətraflı aşağıdakı videolarda.

2 ildir “Atropatena Group” QSC-nin İcraçı direktoru vəzifəsini icra edən Gökhan Becerikli "Marja"ya təqdim etdiyi yazılı açıqlamada bildirib ki, bu gün rəsmi olaraq heç bir işçi işdən çıxarılmamışdır:

"“ATENA Group” Qapalı Səhmdar Cəmiyyətinin Direktorlar Şurasının 20 aprel 2018-ci il tarixli 4 saylı protokolu ilə qəbul edilmiş qərarına əsasən şirkətin zərərlərinin azaldılması, xərclərinin optimallaşdırılması və daha çox istehsala fokuslanmaq məqsədi ilə bugündən etibarən distribusiya və mühafizə xidmətləri kənar şirkətlərə ötürülmüşdür. Belə bir qərarın qəbul edilməsinə səbəb, şirkətin 2 ildən artıqdır zərərlə işləməsi, işçilər, banklar və təchizatçılar qarşısında öhdəliklərini vaxtında icra edə bilməməsi olmuşdur. Qəbul edilən qərar barədə işçilər məlumatlandırılmış və onlara bildirilmişdir ki, distribusiyanı qəbul edən şirkətdə onların işlə təmin edilmələri barədə danışıqlar aparılır. Rəsmi olaraq, bugün heç bir işçi işdən çıxarılmamışdır. Direktorlar Şurasının qərarının icrası zamanı hər hansı işçi ixtisar ediləcəyi təqdirdə Azərbaycan Respublikasının əmək qanunvericiliyinə müvafiq olaraq, kompensasiya ödəniləcək və digər imtiyazlar təqdim ediləcəkdir".

"DEYİLƏNLƏR HƏQİQƏTİ ƏKS ETDİRMİR"

“Atena” şirkətinin satış müdiri Rəfail Rəsulov, Şirkətin Direktorlar Şurasının sədri Qəmbər Sübhanverdiyevin və  İcraçı direktor Gökhan Beceriklinin iddialarına münasibət bildirib.

Rəfail Rəsulov "Marja"ya açıqlamasında bildirib ki, Zərəngiz Məmmədovanın şirkətdə müəyyən səhm payına malik olması əsas vermir ki, onun həyat yoldaşı İsrafil Qasımov başına qoçu dəstəsi yığıb, hər üç şirkətə, yəni “Atena” süd zavodu, “Aqat Aqro” heyvandarlıq fermasına və “Atena Qrup” QSC-nin baş ofisinə hücum etsin, işçiləri qanunsuz olaraq işdən kənarlaşdırmaqla şirkətlərin fəaliyyətini iflic vəziyyətə salsın:

“Onu da qeyd edim ki, şirkətlər barədə deyilənlər də həqiqəti əks etdirmir. Dünənə kimi hər üç şirkətin fəaliyyəti normal olub, istehsal və satış sahəsində heç bir neqativ hal olmamışdır.         

Onu da qeyd etməliyik ki, şirkətlərin fəaliyyəti ilə bağlı bütün məsələlər bağlı qapılar arxasında səlahiyyətləri olmayan şəxslərlə deyil, səhmdarlar və əmək kollektivi ilə müzakirə olunmalı və qərar şəkilində kollektivə elan olunmalıdır.

Şirkətin icraçı direktoru qeyd edib ki, satışın digər şirkətə verilməsi 8% xərcləri azaldır, əvvəla bu yanlış rəqəmdir və bu məbləğ üçün 250 nəfər işçini işdən azad etməyə birbaşa əsas vermir. Bu proses ölkə prezidentinin apardığı yeni iş yerlərinin açılması  siyasətinə ziddir. İşdən xəbəri olmayan və şəxsi marağını güdən türkiyə vətəndaşı ilə dünənki vergi məmur əlbir olaraq 250 işçini işsiz qoymuşdur.

Bir də ki, kim kimin qohumu olması əsas vermir ki, onun əmlak və əmək hüquqlarının pozulmasına rəvac versin. İ.Qasımov 400 nəfərə yaxın işçinin əmək və əmlak hüquqlarını pozduğuna görə qanun qarşısında cavab verməli olacaq. Atena məhsulları illərdir ki daxili və xarici bazarda tanınmış bir brenddir. Bu gün onu bu vəziyyətə gətirmək İ.Qasımovun son 5 ildə məqsədli fəaliyyətinin nəticəsidir. Bu barədə yəqin ki, konkret faktlarla həm ictimayətə, həm də hüquq-mühafizə orqanlarına məlumat veriləcək”.