"AGBank” 2016-cı ildə 35 milyon 630 min manat zərər etməsinin ardından, 2017-ci ildə də 6 milyon 688 min manat zərər edib. Nəticədə “AgBank”ın yığılmış cəmi zərəri 67 milyon 178 min manata qalxıb. Yığılmış zərər Bankın 102 milyon 200 min manatlıq nizamnamə kapitalının böyük hissəsini silib. Bankın xüsusi kapitalı 41 milyon 881 min manata, cəmi balans kapitalı isə 47 milyon 174 min manata düşüb. 

"AGBank" 2015-ci ili 88 milyon 386 min manat zərər ilə başa vurmuşdu. 

Bu il, kapital mövqeyinin məhkəmləndirilməsi məqsədilə  “AGBank” ASC tərəfindən hər birinin nominal dəyəri 2 manat olan 7 milyon manat məbləğində 3,5 milyon ədəd adi səhmlərin emissiya edilməsi qərara alınmışdır.

Nizamnamə kapitalının 7 milyon manat artırılmasından sonra Bankın məcmu kapitalının 50 milyon manatı üstələyəcəyi gözlənilir.

Emissiyanın “İnformasiya memorandumu”nda qeyd olunur ki, yeni səhm buraxılışı ilə cəlb ediləcək vəsait bankın maliyyə sabitliyinin güclənməsinə, bu da bankın gəlirinin artmasına səbəb olacaqdır. Bu isə öz növbəsində bankın dividentlərinin artması ilə nəticələnəcəkdir.

Xəbər verdiyimiz kimi, hər birinin nominal dəyəri 2 manat olan 7 milyon manat məbləğində 3,5 milyon ədəd adi səhmlərə abunə yazılışı 26 fevral 2018-ci il tarixində başlayıb və 26 may 2018-ci il tarixində yekunlaşır. Abunə yazılışında rezident investorlarla yanaşı qeyri-rezident investorlarda iştirak edə bilər.

Abunə yazılışı 3 ay ərzində həyata keçiriləcək.

Abunə yazılışı başa çatdıqdan sonra 5 (beş) iş günü ərzində qiymətli kağızların BFB-də kütləvi yerləşdirilməsinə başlanılacaq və 7 (yeddi) iş günü ərzində yerləşdirilməsi həyata keçiriləcək.

Kütləvi təklif olunan əlavə səhmlərin yerləşdirilməsi aşağıdakı ardıcıllıqla həyata keçiriləcək:

-ilk 2 iş günü ərzində üstünlük hüququna malik olan səhmdarlar arasında səhmlərin yerləşdirilməsi;

-digər investorlar arasında səhmlərin yerləşdirilməsi.