“AgBank”ın xərcləri gəlirlərindən çox olub

“AgBank” 2017-ci ili 6 milyon 688 min manat zərər ilə başa vurub.

“Marja” Bankın maliyyə hesabatlarına istinadən xəbər verir ki, 2016-cı illə müqayisədə 2017-ci ildə “AgBank”ın gəlirləri kəskin azalıb.

Ötən il Bankın cəmi gəlirləri 50 milyon 603 min manat, o cümlədən faiz gəlirləri 23 milyon 56 min manat, qeyri-faiz gəlirləri 27 milyon 547 min manat təşkil edib. Bankın faiz və qeyri-faiz xərcləri cəmi gəlirlərindən çox (55 milyon 833 min manat) olduğundan 5 milyon 230 min manat əməliyyat zərəri yaranıb. Bundan başqa, aktivlər üzrə mümkün zərərlərin ödənilməsi üçün xüsusi ehtiyatın yaradılmasına 1 milyon 347 min manatlıq ayırma zərəri daha da artırb və 6 milyon 688 min manata çatıb.

“AgBank” 2016-cı ildə 39 milyon 547 min manat faiz, 32 milyon 261 min manat qeyri faiz gəliri əldə etmiş (cəmi 71 milyon 808 min manat), həmin ili 35 milyon 630 min manat zərər ilə bağlamışdı.

2016-cı ildə "AgBank"ın gəlirləri xərclərini üstələmiş, Bank 1 milyon 482 min manat əməliyyat mənfəəti əldə edə bilmişdi. Lakin ehtiyatlara təxminən 37 milyon manat ayırdığından həmin ili 35,6 milyon manat zərər ilə bağlamışdı. 2017-ci ildə Bankın xərclərinin gəlirlərini üstələməsi isə, gəlirlərin azalması fonunda Bankın ciddi qənaətə gedə biləcəyini göstərir.

NİZAMNAMƏ KAPİTALI "ƏRİYİB"

 “AgBank”ın yığılmış cəmi zərəri 67 milyon 178 min manata qalxıb. Yığılmış zərər Bankın 102 milyon 200 min manatlıq nizamnamə kapitalının böyük hissəsini silib. Bankın xüsusi kapitalı 41 milyon 881 min manata, cəmi balans kapitalı isə 47 milyon 174 min manata düşüb.

AKTİVLƏRİ VƏ KAPİTALI AZALIB

31 Dekabr 2017-ci il tarixində “AgBank” 488 milyon 403 min manat cəmi aktivlərə, 441 milyon 233 min manat cəmi öhdəliklərə və 47 milyon 174 min manat cəmi balans kapitalına malik olub.

31 Dekabr 2017-ci il tarixində “AgBank” 520 milyon 3 min manat cəmi aktivlərə, 466 milyon 199 min manat cəmi öhdəliklərə və 53 milyon 804 min manat cəmi kapitala malik idi.

MƏCMU KAPİTALI 50 MİLYONDAN AŞAĞI DÜŞƏN BANKIN LİSENZİYASI LƏĞV EDİLƏ BİLƏR

“AgBank” 2017-ci ilin sonuna məcmu kapitalının məbləğini açıqlamayıb. Məcmu kapitalın adekvatlıq əmsalı üzrə norma 10 olsa da, "AgBank"da fakt 8,15-dir. Bankın göstəricisinin normadan aşağı olması, məcmu kapitalın minimal tələb olan 50 milyon manatdan da aşağı düşdüyünə işarədir. 

Bankın müştərilərə verdiyi kreditlər 2016-cı ilin sonundakı 292 milyon 226 min manatdan 282 milyon 907 min manata düşüb. Cəmi kredit qoyuluşlarında vaxtı keçmiş kreditlərin məbləği 147 milyon 296 min manat olub.