Artıq bir aya yaxındır ki, İranda sitrus meyvələrinin yığımına başlayıblar. Cari ildə İranın Gilan və Mazandaran əyalətlərində bol məhsul yetişdirilib. Təkcə İran Astarasında 520 hektar sahədə kivi yetişdirilib.

Yerli fermer Əhməd Cəfərzadə bildirib ki, sitrus meyvələri daxili bazarla yanaşı, xaricə də ixrac olunur. Bu meyvələr Rusiya, Ukrayna, Belarus və Moldovaya göndərilir.

Qeyd edək ki, adıçəkilən ölkələrə İrandan daşınan yüklər məhz Azərbaycan ərazisindən aparılır. İranlı fermerlər yük avtomobillərinin aztutumlu olmasından şikayət edirlər və səbirsizliklə Astara (İran)-Astara (Azərbaycan) dəmir yolunun istifadəyə verilməsini gözləyirlər.

“Şimal-Cənub” Beynəlxalq Nəqliyyat Dəhlizinin əsasını təşkil edən Qəzvin-Rəşt dəmir yolunun davamı olacaq Rəşt-Astara (İran)-Astara (Azərbaycan) yolu təkcə İran fermərlərinin deyil, istehsal prosesi ilə məşğul olan bütün sahibkarların imkanlarının artmasına səbəb olacaq.

Bu imkandan, həmçinin Azərbaycanın cənub rayonlarının fermerləri də istifadə edəcəklər. Astara və Lənkəran rayonlarında da sitrus meyvə bağları çoxdur və fermerlər topladıqları məhsulu ixrac etməkdə maraqlıdırlar. Deməli, Astara (İran)-Astara (Azərbaycan) dəmir yolunun istifadəyə verilməsi ölkəmiz üçün ikiqat əhəmiyyətlidir. Bir tərəfdən nəinki İrandan, eləcə də Cənub-Şərqi Asiya ölkələrindən daşınan mallar Azərbaycan üzərindən Rusiya və Avropaya aparılacaq və dövlətimizin büdcəsinə tranzit gəlirləri daxil olacaq. Digər tərəfdən isə azərbaycanlı fermerlər istehsal etdikləri məhsulu daha asan ixrac etmək imkanı qazanacaqlar.

İranın Dəmir Yolları İdarəsinin beynəlxalq yükdaşımalar şöbəsinin müdiri Hoseyn Aşuri bildirib ki, gələn ay Astara-Astara dəmir yolu istifadəyə veriləcək və iki ölkənin dəmir yolları sistemləri birləşəcək. Bundan başqa, İran Astarasında tikilən stansiya və yük terminalında da son tamamlama işləri aparılır.

© Azərtac