ABŞ Prezidenti Donald Tramp Rusiya ilə Ukrayna arasında müharibənin sona çatdırılması məqsədilə Rusiya Prezidenti Vladimir Putinlə danışıqların davam etdiyini bildirib. Trampın sözlərinə görə, tərəflər münaqişənin həllinə indiyədək heç vaxt olmadığı qədər yaxındırlar.

Tramp Ağ Evdə keçirilən dəyirmi masa toplantısında jurnalistlərin suallarını cavablandıraraq beynəlxalq gündəmdəki son hadisələrə münasibət bildirib.

ABŞ administrasiyasının Rusiya-Ukrayna müharibəsinin dayandırılması istiqamətində diplomatik səylərini davam etdirdiyini vurğulayan Tramp Moskva ilə təmasların intensivləşdiyini və danışıqlarda irəliləyiş əldə olunduğunu qeyd edib.

“Ötən gün Vladimir Putinlə onun Ukraynadakı müharibəsinin həlli barədə danışırdıq. Düşünürəm ki, bu məsələnin həllinə yaxınlaşırıq. Bəlkə də hazırda həllə əvvəl heç vaxt olmadığı qədər yaxınıq”, – deyə Tramp bildirib. 

Daha əvvəl Moskvanın razılaşma əldə etmək məsələsində Kiyev rəhbərliyindən daha istəkli olduğunu bildirən ABŞ Prezidenti Rusiyanın müharibəni dayandırması üçün danışıqların davam etdirildiyini vurğulayıb.

Tramp həmçinin Rusiya və Çinin İranla davam edən müharibəyə müdaxilə etməməsindən “olduqca məmnun” olduğunu bildirib.

Onun sözlərinə görə, xüsusilə Rusiyanın münaqişəyə müdaxilə etmək imkanları olsa da, Moskva hərbi əməliyyatlara qoşulmayıb.

Rusiya amerikalı müəllimi azad edib

Tramp Rusiyada həbsdə saxlanılan ABŞ vətəndaşı, keçmiş müəllim Stiven Habbardın (Stephen Hubbard) azad edilməsi ilə bağlı da açıqlama verib.

O bildirib ki, Habbardın məsələsini Vladimir Putinlə telefon danışığı zamanı gündəmə gətirib və Rusiya Prezidenti onun azad edilməsinə razılıq verib.

“Onun azad edilməsi müqabilində Rusiyaya heç nə vermədik. Bu isə çox nadir hallarda baş verir. Biz bunun müqabilində heç nə vermədik”, – deyə Tramp vurğulayıb.

ABŞ Prezidenti Habbardın ABŞ-ın xüsusi nümayəndəsi Stiv Uitkoff (Steve Witkoff) və ailə üzvləri ilə birlikdə ölkəsinə qayıtmaq üçün yola düşdüyünü bildirib.

Tramp Rusiyanın azadetmə qərarını yüksək qiymətləndirərək bu prosesdə iştirak edən tərəflərə təşəkkür edib.

Reuters-in məlumatına görə, Habbardın azad edilməsi Uitkoffun Sankt-Peterburqda Putinlə keçirdiyi görüş zamanı baş tutub. Görüşdə Rusiya-Ukrayna müharibəsinin dayandırılması istiqamətində diplomatik təmasların davam etdirilməsi də müzakirə olunub. 

Stiven Habbard kimdir?

ABŞ vətəndaşı Stiven Ceyms Habbard 2014-cü ildə Ukraynanın Xarkov vilayətinə köçüb. Miçiqan ştatında anadan olan və əvvəllər müəllim işləyən Habbard 2022-ci ilin aprelində Rusiyanın Ukraynaya genişmiqyaslı hərbi müdaxiləsindən sonra saxlanılıb.

Rusiya tərəfi onu Ukrayna Silahlı Qüvvələrinin tərkibində muzdlu döyüşçü kimi fəaliyyət göstərməkdə ittiham edib. 2024-cü ilin oktyabrında Rusiya məhkəməsi Habbardı 6 il 10 ay müddətinə azadlıqdan məhrum edib. Habbardın vəkili isə onun hərbi əməliyyatlarda iştirak etmədiyini və ittihamların əsassız olduğunu bildirib. 74 yaşlı Habbard dörd ildən artıq həbsdə saxlanıldıqdan sonra 21 oktyabr 2026-cı ildə azadlığa buraxılıb. 

Hər gün yeni vakansiyalar - AzVak.az-da