Azərbaycanda dövlət müəssisələrinin bazardakı fəaliyyətinin özəl şirkətlərlə rəqabət baxımından qiymətləndirilməsi nəzərdə tutulur.

Marja.az xəbər verir ki, Milli Fəaliyyət Planına əsasən, dövlət müəssisələrinin fəaliyyətində rəqabətli neytrallıq prinsiplərinin tətbiqinin təkmilləşdirilməsi üçün təkliflər hazırlanacaq.

Bu tədbir nəzarət zərfi dövlətə məxsus banklara şamil edilməyəcək.

2027–2028-ci illərdə əvvəlcə rəqabətli neytrallığın qiymətləndirilməsi üçün göstərici və meyarlar müəyyənləşdiriləcək. Daha sonra həmin göstəricilər əsasında dövlət müəssisələrində mövcud vəziyyət təhlil ediləcək.

Nəticədə dövlət müəssisələrinin fəaliyyətində rəqabətli neytrallığın təşviqi üzrə əsaslandırılmış təkliflərin hazırlanması nəzərdə tutulur.

Prosesdə Antiinhisar və İstehlak Bazarına Nəzarət Dövlət Agentliyi ilə yanaşı Azərbaycan İnvestisiya Holdinqi, AZCON, İqtisadiyyat Nazirliyi, Rəqəmsal İnkişaf və Nəqliyyat Nazirliyi və digər qurumlar iştirak edəcəklər.

Hər gün yeni vakansiyalar - AzVak.az-da

Bəzi dövlət inhisarlarında rəqabətli bazar modelinə keçid nəzərdə tutulur

Azərbaycanda xüsusi tənzimlənən infrastruktur və xidmət sahələrinin, eləcə də dövlətin müstəsna iştirak etdiyi bəzi bazarların rəqabətli bazar modelinə mərhələli keçid imkanları araşdırılacaq.

Milli Fəaliyyət Planına əsasən, tədbirin 2028–2029-cu illərdə həyata keçirilməsi nəzərdə tutulur.

İlk mərhələdə rəqabətli bazar modelinə keçid potensialı olan xüsusi tənzimlənən infrastruktur və xidmət sahələri, həmçinin dövlətin müstəsna iştirak etdiyi məhsul və xidmət bazarları müəyyən ediləcək.

Daha sonra seçilmiş sahələr üzrə beynəlxalq təcrübə və milli iqtisadiyyatın xüsusiyyətləri təhlil ediləcək, bazar modelinə keçid imkanları qiymətləndiriləcək.

Zərurət yarandığı halda xüsusi tənzimləmə tətbiq olunan subyektlərin və fəaliyyət istiqamətlərinin mövcud siyahılarında dəyişiklik layihələri hazırlanacaq.

Hər gün yeni vakansiyalar - AzVak.az-da