Qızılın qiyməti dolların zəifləməsindən dəstək alaraq cümə axşamı cüzi yüksəlib.

Marja.az xəbər verir ki, bazar iştirakçıları ABŞ Federal Ehtiyat Sisteminin (FED, ABŞ Mərkəzi Bankı) faiz siyasətinin gələcək istiqamətini müəyyənləşdirə biləcək mühüm ABŞ inflyasiya göstəricilərini gözləyirlər.

Qızılın qiyməti 1,3% artaraq bir unsiya üçün 4 412,84 dollara yüksəlib. ABŞ-da dekabr çatdırılmalı qızıl fyuçersləri isə 0,1% ucuzlaşaraq 4 457,10 dollara düşüb.

“Marex”in analitiki Edward Meir bildirib ki, hazırkı mərhələdə Fars körfəzindəki geosiyasi hadisələr qızıl üçün ikinci dərəcəli amil olaraq qalır. Onun sözlərinə görə, qiymətli metal daha çox zəifləyən dollardan dəstək alır. ABŞ faiz dərəcələrinin yüksəlməsinə baxmayaraq, dollar nəzərəçarpacaq dərəcədə möhkəmlənməyib.

ABŞ-da İstehsalçı Qiymətləri İndeksi (ÜFE/PPI) Bakı vaxtı ilə isə 16:30-da açıqlanacaq. İstehlak inflyasiyası göstəricilərinin isə cümə günü dərc olunması gözlənilir.

İqtisadçıların əksəriyyəti FED-in 15–16 sentyabr tarixlərində keçiriləcək iclasında faiz dərəcəsini dəyişməyəcəyini və ilin qalan hissəsində də faizlərə toxunmayacağını proqnozlaşdırır. Bu gözlənti bazarlarda faiz artımı ilə bağlı formalaşan qiymətləndirmələrlə ziddiyyət təşkil edir.

“CME FedWatch Tool”un məlumatlarına görə, bazarlar Fed-in bu ay faiz dərəcəsini artırması ehtimalını 60% səviyyəsində qiymətləndirir. Daha yüksək faiz dərəcələri gəlir gətirməyən aktivləri, o cümlədən qızılı investorlar üçün adətən daha az cəlbedici edir.

ANZ-nin baş əmtəə strateqi Daniel Hynes bildirib ki, ABŞ-ın maliyyə təzyiqləri dövlət borcunun və həmin borcun maliyyələşdirilməsində istifadə olunan valyutanın uzunmüddətli dəyərinə inamı zəiflətməkdə davam etdiyindən qızıl dəstək tapır.

Ötən ay ABŞ-ın ümumi dövlət borcu tarixdə ilk dəfə 40 trilyon dolları ötüb. Bu hadisə ölkədə maliyyə böhranının formalaşa biləcəyinə dair yeni xəbərdarlıqlara səbəb olub.

Digər qiymətli metallardan spot gümüş 0,2% bahalaşaraq 67,42 dollara yüksəlib. Platin 0,6% ucuzlaşaraq 1 885,02 dollara düşüb, palladium isə 0,2% bahalaşaraq 1 355,50 dollardan ticarət olunub.

İş elanları AzVak.az-da