Neft qiymətləri Brent markalı xam neftin bir barelinin 100 dollar həddini aşmasından sonra cümə axşamı əsasən sabit qalıb.

Marja xəbər verir ki, investorlar altı ay əvvəl başlayan müharibədən sonra İran və ABŞ-ın dəniz daşımalarına qarşı indiyədək ən iri hücumları həyata keçirməsinin neft təchizatında fasilələri daha da dərinləşdirə biləcəyini nəzərə alırlar.

Bakı vaxtı ilə saat 08:30-da Brent markalı neftin qiyməti 2,8% bahalaşma ilə 101 dollardan, ABŞ-ın WTI markalı xam nefti isə  96,24 dollardan ticarət olunub.

Brent neftinin qiyməti avqustun əvvəlində qeydə alınan aşağı səviyyələrdən bəri təxminən 30% yüksəlib. Buna ABŞ və İran arasında hücumların dayandırılması ilə bağlı davamlı razılaşmanın əldə olunmaması və ayın sonrakı dövründə döyüşlərin yenidən başlaması səbəb olub.

İran çərşənbə günü ABŞ-ın beş İran neft tankerini batırmasından sonra Hörmüz boğazı yaxınlığında 10 gəmiyə hücum etdiyini açıqlayıb. İran İslam İnqilabı Keşikçiləri Korpusu isə yeni hücumlara cavab veriləcəyini və qarşı tədbirlərin daha da sərtləşdiriləcəyini bildirib.

ANZ-nin analitiki Daniel Hynes müştərilərə göndərdiyi qeyddə bildirib ki, qarşılıqlı hücumlar Fars körfəzindən neft axınının yaxın gələcəkdə də fasilələrlə üzləşəcəyinə işarə edir.

Körfəz ölkələrinin neft ixracı üçün alternativ marşrutlar üzərində də təzyiq artır. İranla əlaqəli husilərin Səudiyyə Ərəbistanına hücumlarını intensivləşdirməsi Qırmızı dəniz vasitəsilə həyata keçirilən xam neft daşımalarını təhdid edir.

OCBC-nin analitiki Christopher Wong bildirib ki, Hörmüz boğazından faktiki olaraq nə qədər neftin keçdiyinə dair qeyri-müəyyənlik və dəniz daşımalarındakı fasilələr fiziki neft bazarında təklifi məhdud saxlayır. Bu da neft qiymətlərində geosiyasi risk mükafatını dəstəkləyir.

ABŞ Enerji İnformasiya Administrasiyası (EIA) da çərşənbə günü Yaxın Şərqdən neft təklifinin azalması fonunda qlobal neft ehtiyatlarının geriləyəcəyini əsas gətirərək bu il və gələn il üçün neft qiymətləri üzrə proqnozlarını yüksəldib.

İş elanları AzVak.az-da