“Unibank Kommersiya Bankı” ASC-nin 5 milyon ABŞ dolları həcmində istiqrazlarının Bakı Fond Birjasında (BFB) yerləşdirilməsi başa çatıb.

Marja.az Bakı Fond Birjasının məlumatına istinadən xəbər verir ki, 11 avqust 2026-cı il tarixində keçirilmiş hərrac zamanı emissiyanın bütün həcmi – 5 milyon ABŞ dolları tam yerləşdirilib.

Hərrac çərçivəsində investorlar tərəfindən ümumilikdə 5 milyon dollar məbləğində 57 sifariş təqdim edilib. Sifarişlərin ümumi həcmi emissiya məbləğinə bərabər olduğundan yerləşdirmə 100% baş tutub.

İstiqrazları ümumilikdə 54 investor əldə edib.

“Unibank”ın bir istiqrazının nominal və hərrac qiyməti 100 ABŞ dolları təşkil edib. Emissiya çərçivəsində ümumilikdə 50 min ədəd istiqraz buraxılıb.

İstiqrazların illik gəlirlilik faizi 8% müəyyən edilib. Faiz ödənişləri istiqrazların yerləşdirildiyi tarixdən etibarən hər üç aydan bir həyata keçiriləcək. Qiymətli kağızların tədavül müddəti 6 ildir.

Beləliklə, emissiya tam həcmdə tədavüldə qaldığı halda “Unibank” investorlarına ildə təxminən 400 min dollar kupon gəliri ödəyəcək. 6 illik müddət ərzində isə istiqrazlar üzrə ümumi faiz ödənişlərinin məbləği təxminən 2,4 milyon dollara çata bilər.

Faizli, təmin edilməmiş, sənədsiz və adlı formada buraxılmış istiqrazların ISIN kodu AZ2019002024-dür. Yerləşdirmə kütləvi, birqiymətli hərrac üsulu ilə həyata keçirilib.

Emissiyanın anderrayteri “Unicapital İnvestisiya Şirkəti” ASC-dir.

Bakı Fond Birjasının Listinq Komitəsi hələ 25 iyun 2026-cı il tarixində “Unibank”ın istiqrazlarının ticarətə buraxılması barədə qərar vermişdi. 11 avqustda baş tutan yerləşdirmənin nəticələri BFB-nin müvafiq qaydalarının tələblərinə cavab verdiyindən istiqrazlar Standart Bazar Listinq seqmentinə daxil edilib.

Diqqətçəkən məqam odur ki, hərracda tələb emissiyanın bütün həcmini qarşılayıb. 54 investorun iştirakı dollarla və 8% illik gəlirliliyə malik uzunmüddətli bank istiqrazlarına investor marağının mövcud olduğunu göstərir.