2026-cı ilin yanvar-iyun aylarında Azərbaycanda ümumi daxili məhsulun (ÜDM) həcmi 65 milyard 207 milyon manat təşkil edib. Ölkə iqtisadiyyatı ötən ilin eyni dövrü ilə müqayisədə real ifadədə 0,8% böyüyüb.

Marja.az Dövlət Statistika Komitəsinə istinadən xəbər verir ki, yanvar-may aylarında iqtisadi artım qeydə alınmadığı halda, ilk yarımilin yekununda ÜDM-də 0,8%-lik artım yaranıb.

Hesabat dövründə neft-qaz sektorunda 19 milyard 610,5 milyon manatlıq əlavə dəyər formalaşıb. Bu sektor üzrə ÜDM ötən ilin eyni dövrü ilə müqayisədə 0,7% azalıb. Yanvar-may aylarında azalma 1% təşkil etmişdi.

Qeyri-neft-qaz sektorunda isə ÜDM 45 milyard 596,5 milyon manata çatıb və illik müqayisədə 1,5% artıb. Beş ayın yekununda bu sahədə artım 0,4% idi.

Əsas kapitala investisiyalar kəskin artıb

İlin ilk yarısında əsas kapitala 9 milyard 295,2 milyon manat investisiya yönəldilib. İnvestisiyaların həcmi ötən ilin eyni dövrü ilə müqayisədə 13,8% artıb.

Müqayisə üçün, 2026-cı ilin yanvar-may aylarında əsas kapitala investisiyalar illik ifadədə 2,1% azalmışdı.

Qeyri-neft-qaz sektoruna yatırılan investisiyaların həcmi 6 milyard 131,6 milyon manat təşkil edib və 5,5% artıb. Yanvar-may aylarında bu göstərici üzrə 14,7%-lik azalma qeydə alınmışdı.

Sənaye istehsalı 33 milyard manatı ötüb

2026-cı ilin yanvar-iyun aylarında Azərbaycanda 33 milyard 71 milyon manatlıq sənaye məhsulu istehsal edilib. Sənaye istehsalı real ifadədə 0,1% artıb. Yanvar-may aylarında artım 0,2% olmuşdu.

Qeyri-neft-qaz sənayesində məhsul istehsalı 10 milyard 769,6 milyon manat təşkil edib və illik müqayisədə 4,1% yüksəlib. Beş ayın yekununda bu sahədə artım 5,8% idi.

Nəqliyyat və rabitə xidmətlərində yüksək artım

Kənd təsərrüfatı məhsullarının dəyəri 7 milyard 85,3 milyon manat olub və 2,2% artıb.

Nəqliyyat və anbar təsərrüfatı xidmətlərinin həcmi 7 milyard 817,6 milyon manat təşkil edib. Bu sahədə real artım 8%-ə çatıb. Yanvar-may aylarında artım 6,8% olmuşdu.

İnformasiya və rabitə xidmətlərinin dəyəri 1 milyard 966,5 milyon manat təşkil edib və ötən ilin eyni dövrü ilə müqayisədə 7,5% artıb.

Pərakəndə ticarət dövriyyəsi isə 3,7% artaraq 32 milyard 388,8 milyon manata yüksəlib.

Statistik göstəricilər ilk yarımildə iqtisadi artımın əsasən qeyri-neft-qaz sektoru, investisiyalar, nəqliyyat və informasiya-rabitə xidmətləri hesabına dəstəkləndiyini göstərir.

Hər gün yeni vakansiyalar - AzVak.az-da