Azərbaycan-Gürcüstan sərhədində yeni dövlət sərhədindən buraxılış məntəqəsinin yaradılması istiqamətində layihələndirmə işləri aparılır.

Marja.az xəbər verir ki, bunu Dövlət Gömrük Komitəsinin sədri Şahin Bağırov bildirib.

Onun sözlərinə görə, Azərbaycanın öz suverenliyini tam bərpa etməsindən sonra dövlət sərhədləri boyunca yeni keçid məntəqələrinin yaradılması və mövcud infrastrukturun inkişafı mühüm istiqamətlərdən birinə çevrilib.

Şahin Bağırov bildirib ki, hazırda Ağbənd keçid məntəqəsi ilə bağlı dövlət sərhədində işlər aparılır.

Bununla yanaşı, DGK sədri qeyd edib ki, Gürcüstanla sərhəddə yeni keçid məntəqəsinin yaradılması üzrə də layihələndirmə işləri həyata keçirilir.

“Gürcüstanla bağlı layihələndirmə işimiz var və biz hökumət səviyyəsində bu işi nəzərdən keçiririk. Hökumətimiz bu sahədə müəyyən tapşırıqlar verir. Gürcüstanla yeni keçid məntəqəsinin açılması üçün ilk növbədə layihələndirmə işləri aparılmalıdır və biz bunu həyata keçiririk”, - deyə Şahin Bağırov bildirib.

Komitə sədrinin sözlərinə görə, layihələndirmə mərhələsindən sonra növbəti mərhələdə keçid məntəqəsinin tikintisi məsələsinə baxılacaq.

Şahin Bağırov bildirib ki, yeni keçid məntəqəsi müasir standartlara uyğun olacaq və burada birgə nəzarət mexanizminin tətbiqi nəzərdə tutulur.

Onun sözlərinə görə, bu, Azərbaycan və Gürcüstan gömrük xidmətlərinin yaxın məsafədə, eyni məkanda nəqliyyat vasitələrini yoxlamasına imkan verəcək.

“Bu, daha sadələşdirilmiş gömrük xidməti olacaq. Azərbaycan və Gürcüstan gömrük xidmətlərinin yaxın bir məkanda nəqliyyat vasitələrini eyni anda yoxlamaq imkanı olan keçid məntəqəsi yaradılacaq”, - deyə DGK sədri qeyd edib.

Şahin Bağırov vurğulayıb ki, birgə nəzarət mexanizmi həm vaxta qənaət edəcək, həm nəzarətin keyfiyyətini artıracaq, həm də qeyri-qanuni fəaliyyətlə bağlı potensial risklərin daha tez müəyyənləşdirilməsinə imkan yaradacaq.

Onun sözlərinə görə, yeni keçid məntəqəsinin yaradılması nəqliyyat vasitələri üçün alternativ seçimlərin artmasına da xidmət edəcək.

DGK sədri bildirib ki, keçid məntəqələrinin sayının artırılması istiqamətində ölkədə işlər davam etdirilir və zəruri hallarda bu sahədə yeni tapşırıqlar əsasında əlavə layihələr də icra olunacaq.

“Biz bu sahədə, dediyim kimi, Gürcüstanla yeni keçid məntəqəsi üzərində iş aparırıq. Növbəti mərhələdə qarşımıza hansı məsələ qoyulacaqsa, həmin istiqamətdə də iş aparılacaq”, - deyə Şahin Bağırov bildirib.

İş elanları AzVak.az-da

©  "Report" İnformasiya Agentliyi və "İctimai TV"yə müsahibədən