Qlobal elektrik avtomobili (elektromobil) bazarının ən böyük oyunçularından biri olan Çin şirkəti BYD Türkiyədə qurmağı planlaşdırdığı zavod layihəsini dayandırdığını açıqlayıb. Şirkət Avropa bazarında lokallaşma strategiyalarına fokuslanmaq qərarına gəlib.

Marja xəbər verir ki, BYD-nin vitse-prezidenti Stella Li Londonda “Reuters”ə verdiyi eksklüziv müsahibədə Türkiyədəki istehsal müəssisəsinin qurulması prosesinin dayandırıldığını və istehsala başlanılması üçün konkret təqvimin müəyyən edilmədiyini bildirib.

Şirkətdaxili əməliyyatlarda prioritetlərin dəyişdiyini vurğulayan Li bu açıqlamanı verib:

“Hazırda şirkət olaraq birinci prioritetimiz Macarıstan bazarındakı investisiyalarımızdır. İkinci fokus nöqtəmiz isə Avropa üzrə istehsal həyata keçirə biləcəyimiz ikinci zavod üçün uyğun lokasiyanın tapılması olacaq”.

BYD ötən il Türkiyə hökuməti ilə Manisada təxminən 1 milyard dollar dəyərində istehsal müəssisəsinin yaradılmasını nəzərdə tutan rəsmi saziş imzalamışdı. İllik 150 min avtomobil istehsal gücünə çatması planlaşdırılan bu nəhəng layihə çərçivəsində ərazidə hələlik hər hansı infrastruktur və ya tikinti işlərinə başlanılmamışdı.

Avropa İttifaqının Çin istehsalı olan elektrik avtomobillərinə tətbiq etdiyi gömrük tariflərini aşmaq istəyən BYD regionda birbaşa istehsalçı mövqeyinə keçmək üçün aqressiv strategiya həyata keçirir. Şirkət Macarıstanın Seqed şəhərindəki ilk Avropa zavodunda montaj xətlərini bu ilin dördüncü rübündə işə salmağı planlaşdırır.

Bununla yanaşı, BYD rəhbərliyi Avropada sıfırdan zavod tikintisinin yaradacağı logistika və zaman xərclərindən yayınmaq üçün Stellantis və Volkswagen kimi köklü istehsalçıların istifadəsiz qalan zavodlarını müstəqil şəkildə əldə etmək məqsədilə rəsmi danışıqları davam etdirir. Şirkətin qısa siyahısında İtaliya və Fransadakı istehsal müəssisələri ön plana çıxır.

Hər gün yeni vakansiyalar - AzVak.az-da