Aprelin 17-də Şabran rayonunda Quba Regional Turizm Şurasının ilk iclası keçirilib.

Tədbirdə şuranın əhatə etdiyi Quba, Qusar, Xızı, Xaçmaz, Şabran və Siyəzən rayonlarında fəaliyyət göstərən dövlət qurumlarının yerli strukturlarının nümayəndələri, həmçinin turizm sektoru ilə əlaqəli dövlət və özəl sektor təmsilçiləri iştirak ediblər.

İclas zamanı rayon icra hakimiyyəti başçılarının müavinləri çıxış edərək regional turizm şurasının yaradılmasının ərazinin sosial-iqtisadi inkişafına müsbət təsir göstərəcəyini, əhalinin rifah səviyyəsinin yüksəldilməsinə töhfə verəcəyini vurğulayıblar.

Dövlət Turizm Agentliyi sədrinin müşaviri, regional şuraların sədri Kənan Quluzadə çıxışında şuranın yaradılma məqsədləri və fəaliyyətini tənzimləyən hüquqi çərçivə barədə ətraflı məlumat verib. O qeyd edib ki, bu təşəbbüs dövlət qurumları ilə özəl sektor arasında əməkdaşlığın gücləndirilməsinə, həmçinin turizm sahəsində daha səmərəli qarşılıqlı fəaliyyətin qurulmasına xidmət edəcək.

Azərbaycan Turizm Bürosunun İdarə Heyətinin sədr müavini Rəşad Əliyev çıxışında qeyd edib ki, regional turizm şuraları yerli turizm potensialının daha səmərəli şəkildə üzə çıxarılmasına və vahid yanaşma əsasında turizm məhsullarının inkişafına imkan yaracaq. O, bu yanaşmanın regionların həm daxili, həm də beynəlxalq turizm bazarlarında daha effektiv tanıdılmasına şərait yaradacağını bildirib.

Həmçinin Dövlət Turizm Agentliyinin Mədəni irs və regional turizm şöbəsinin müdiri Elgün Cavadov tərəfindən Agentliyin şuranın əhatə etdiyi rayonlarda həyata keçirdiyi fəaliyyətlər barədə təqdimat edilib.

Görüş çərçivəsində şuranın prioritet fəaliyyət istiqamətləri, regionlarda turizmin dayanıqlı inkişafını təşviq edən birgə layihələrin icrası, müxtəlif qurumlar arasında əlaqələndirmənin gücləndirilməsi və operativ qərar qəbuletmə mexanizmlərinin təkmilləşdirilməsi məsələləri müzakirə olunub.

Bununla yanaşı, regionlarda turizm infrastrukturunun inkişafı, xidmət səviyyəsinin yüksəldilməsi və yerli əhalinin turizm fəaliyyətinə daha fəal cəlb olunması istiqamətində təqdimatlar keçirilib, növbəti mərhələdə icrası nəzərdə tutulan layihələr üzrə əsas prioritetlər müəyyənləşdirilib.

Qeyd edək ki, regional turizm şuraları turizm sahəsinin effektiv idarə olunmasının təmin edilməsi, mövcud çağırışlara çevik yanaşmaların tətbiqi, yerli səviyyədə koordinasiyanın genişləndirilməsi və dövlət-özəl sektor əməkdaşlığının möhkəmləndirilməsi məqsədilə yaradılıb.