"Azərbaycan kapital bazarının mövcud vəziyyətinə nəzər salsaq, listinqdə olan şirkətlərin bazar kapitallaşmasının ümumi daxili məhsula (ÜDM-ə) nisbəti hələ də aşağı səviyyədədir — təxminən 3% ətrafında. Müqayisə üçün qeyd edim ki, bir çox inkişaf edən ölkələrdə bu göstərici xeyli yüksəkdir və bu sahədə ciddi inkişaf potensialımız mövcuddur."

Marja.az-ın məlumatına görə, bunu "PAŞA Bank"ın İlkin Kütləvi Təklif (IPO) çərçivəsində səhmlərinin abunə yazılışına start verilməsi tədbirində Bakı Fond Birjasının İdarə Heyətinin sədri Ruslan Xəlilov bildirirb.

Birjanın sədri ""PAŞA Bank"ın IPO-su nəticəsində bu göstəricinin təxminən 4%-ə yaxınlaşacağı gözlənilir. Bu isə bazarın dərinləşməsi və genişlənməsi baxımından əhəmiyyətli irəliləyişdir" deyərək çıxışına belə davam edib:

"Biz, bazar iştirakçıları olaraq, maliyyə, telekommunikasiya, tikinti və istehsalat sektorlarında fəaliyyət göstərən şirkətlərlə davamlı əlaqədəyik və IPO-nun üstünlüklərini izah edirik. Açıq bazarlardan kapital cəlb edilməsi şirkətlər üçün daha yüksək qiymətləndirmə, şəffaflıq və uzunmüddətli inkişaf imkanları yaradır.

Qeyd etmək vacibdir ki, "PAŞA Bank"ın bu addımı kapital ehtiyacından deyil, daha çox kapital bazarlarının inkişafına töhfə vermək məqsədi daşıyır. Bu isə bazar üçün çox müsbət siqnaldır.

İnanırıq ki, bu təşəbbüs digər şirkətlər üçün də stimul olacaq və yaxın illərdə müxtəlif sektorlardan yeni IPO-ların şahidi olacağıq.

Bugün bazarda özünü daha açıq şəkildə göstərmək və inkişafını yeni mərhələyə daşımaq üçün atılan bu addım, şübhəsiz ki, yüksək qiymətləndirilməli bir hadisədir.

İnanıram ki, "PAŞA Bank"ın bu təşəbbüsü digər sektorlar üçün də nümunə olacaq. Biz düşünürük ki, maliyyə sektorunun digər iştirakçıları, telekommunikasiya, istehsalat və tikinti sahələrində fəaliyyət göstərən bəzi şirkətlər yaxın illərdə IPO-ya çıxmağa namizəd ola bilərlər. Bu addım həmin şirkətlər üçün əlavə stimul rolunu oynayacaq və onların kapital bazarlarının imkanlarından daha geniş istifadə etməsinə şərait yaradacaq.

Çıxışımın sonunda bir daha qeyd etmək istərdim ki, bu təşəbbüsün davamlı olması və digər şirkətlərin də bu prosesə qoşulması ümumi bazarın inkişafına mühüm töhfə verəcək".